袁彩雲年前同胡應湘個仔胡文新甩拖之後，邂逅咗個六呎高嘅飲食界才俊Anthony，佢哋拍咗拖差不多一年，感情穩定，但唔知點解，袁彩雲同Anthony面對記者都好避忌，就好似噚日咁，佢哋兩個晨早8點幾出現機場，袁彩雲冇化妝披頭散髮，同平時個靚樣好唔同。
自行入閘
原本佢哋兩個並排而行，但一見到記者嗰陣，兩個人就即刻好驚，然後嚇到彈開，Anthony仲等都唔等袁彩雲就一支箭咁衝咗入閘，留低袁彩雲自己一個人入閘。馮仁昭問佢點解咁驚青時，袁彩雲只係笑而不答。
其實冇幾耐之前，袁彩雲出席一個首映活動時，曾經話過Anthony會嚟香港，由於佢要去北京做嘢，所以只能夠陪到自己一陣，又話自己今年要單拖過情人節，噚日見佢哋兩個一齊出埠，莫非行程有變，改為出埠過一個浪漫嘅情人節？
