每到挨年近晚，好多人都會去銀行攞利是封嚟用，家陣銀行生意難做，為討顧客歡心，爭取多啲生意，派利是封都要派得夠噱頭，好似星展銀行，就搵咗個財神嚟幫手派利是封兼派宣傳單張。
財神派電話繩
下個禮拜就係農曆新年，星展話，用財神嚟宣傳「派錢嘅生意」就最貼切喎，咦，乜銀行有錢派咩？原來佢哋講嘅係貸款業務。
由上個禮拜六開始，星展分別喺元朗、油麻地同北角嘅分行，搵財神企喺門口，派私人貸款嘅宣傳單張，同埋利是封加電話繩，旨在推廣佢哋新推出嘅私人貸款。
其實財神呢條橋星展上年已經用過，搵財神派傳單，萬幾張一陣就派晒，咁橋唔怕舊，最緊要啲客受，今年加送電話繩。