法興交易員克維爾隱瞞公司炒輸期指，令法興一鋪唔見562億銀，同13年前拖垮英國霸菱銀行嘅神奇小子利森一樣，都係自把自為攞公司啲錢嚟「較飛」。華華好奇，唔知兩個人有冇「敗家」樣睇，搵咗堪輿學家麥玲玲睇睇佢哋面相。
克維爾同利森面相似
麥玲玲同華華講，一般外國人嘅面相都係眉骨高、眼窩深，而克維爾就特別明顯，眉骨高代表野心大，想創一番事業；而眼窩深就代表個人深沉內斂，自我中心，堅持自己想法，又唔善於表達，外人好難知道佢諗緊乜嘢。克維爾係77年出世，31歲，屬蛇，豬年犯太歲，諗嘢同做決定會有所偏差。哦，唔知係咪咁嘅性格加上流年不利，先累法興今年唔見咁多呢？
至於神奇小子利森當年出事時個面相，麥玲玲就話同克維爾好似，都係眉骨高眼窩深，但就冇克維爾咁勁，唔知會唔會係咁，利森先至冇克維爾輸得咁狼，但咁都死啦，搞到成間霸菱執咗。
無獨有偶兩單事件都喺豬年發生，麥玲玲話：「豬年金生水，會容易惹是非同醜聞，特別係金融業。」
華華仲八到，唔少公司老闆都鍾意搵堪輿學家睇吓見工者嘅面相，尤其係啲好重要嘅職位，麥玲玲話，試過有大陸上市公司老闆，搵佢睇吓一啲應徵做助手嘅面相，睇吓有冇同老闆相冲，夾先至會請。至於點樣為之好相，麥玲玲就話，打工仔最緊要係額頭位夠飽滿，咁先至旺老闆同有升職運喎。
