高踭鞋大王鄧耀，去年將公司百麗國際（1880）推上市，創造出「新仙履奇緣」呢個神話，至於主角鄧耀，亦即時登上《福布斯》香港富豪榜。華華噚日見到呢位香港新富豪，諗住恭喜佢，兼問佢有乜感想，點知佢話自己啱啱先知呢個消息。
鄧耀身家257億銀
百麗國際上市嘅新聞多多，唔單止喺招股時凍結咗4464億銀資金，破咗工行紀錄，首日掛牌股價仲急升31%，而鄧耀就以257億幾身家，打入《福布斯》香港富豪榜嘅第13位。
其實早輪好多傳媒都有報道《福布斯》香港富豪榜，但一向低調嘅鄧耀，似乎唔多理呢啲虛榮，噚日以香港鞋業總會會長身份，出席總會搞嘅「香港鞋款設計比賽」頒獎禮時，華華走去恭喜佢，佢仲一頭霧水，跟住要華華話番畀佢知做咗香港富豪。
鄧耀話，家陣成日中港兩頭騰，邊度業務要佢，佢就去邊咁話，忽然有人話佢知做咗香港富豪，自己又冇睇過《福布斯》嘅報道，所以畀唔到回應，連開唔開心都講唔到畀華華知。
唔知佢係太突然唔識反應？定係太超然唔多在乎喇？