西隧加價又再迫爆紅隧，對揸車人士嚟講，過海的確係件痛苦事情。不過世事無絕對，假如香港有水陸兩用的士，以後過海唔使經隧道，咁咪一天都光晒囉！
文：周達之
上山下海唔同計法
唔好以為我講緊笑，其實今年一月開始，日本大阪市已經正式有水陸兩用的士行走；大阪市內有十分一地方係河流之類嘅水路，故有「水之都」稱號，水陸的士絕對有實際需要。
只不過呢款水陸的士嘅顧客對象，其實主要係來自遊客，皆因其收費一啲都唔平，眾所周知日本的士費用之高，位列世界前茅，而水陸的士更係高上加高；水陸的士最多可載3名乘客，落水之後就改用車尾螺旋槳驅動，而車費亦會即刻起另一支旗，改為以行走時間來計算，每小時要收約港幣$1,100元，之後每半小時約港幣$500元。
話時話，原來除咗水陸的士，水陸觀光巴士亦一早已經投入服務，成車人上山下海咁四圍去，確實High到痹，去景點睇怕都毋須再轉船轉車啩！各位下次去大阪旅遊時，真係點都要試一試。