恒指噚日高開，雖然曾經回軟，但點都冇跌穿前日收市價。不過，華華噚日朝早上財經網站AAStocks睇股價，見到恒指跌711點，國企亦勁跌600點，差啲嚇破膽，以為港股又倒插，上討論區八吓，先知原來係AAStocks系統出錯，搞到恒指由升變跌。
網友嚇呆咗
報錯價或者死機呢家嘢，除咗啲銀行網站時有發生，AAStocks都唔係第一次，《香港討論區》有網友話：「AAStocks指數大混亂，恒指同國指明明升緊，但AAStocks就報跌。」TYSON好勞氣咁話：「點數都錯晒。」野田仔亦話：「佢啲data成日錯，今日勁short呀！」blue_kite更話：「做做吓嘢呆咗。」
吉川副郎揶揄：「可能佢洞悉先機，估到恒指跌？」桃花盛開講埋一份：「佢預報啫。」awong就話：「可能係報緊聽日個市。」網友perrylpl好炆話：「hang機都算，但今日係完全報錯！大佬，我哋畀緊幾百蚊㗎！」
到中午AAStocks總算正常番，但腦中一見愛股就嗌：「死啦！我隻股唔知係咪受佢報錯指數影響，𠵱家倒跌！」