望穿秋水，Capcom終於有PS3處子作品，令好多機主拍爛手掌。無他嘅，論動作遊戲佢又真係業內首屈一指，而呢隻加多個新主角嘅《DevilMayCry4》更係質量兼備嘅人氣系列全新一集，臨近農曆年加上對手有限，唔被瘋狂追捧先奇。《蘋果》有幸喺遊戲見街前，同幾位資深機迷率先享受呢份大禮，搞到個個試完都忍唔住問「可唔可以玩多陣？」，就知隻Game有幾得！
撰文：陳福榮
爭女片段實時播放
今次得到CapcomAsia協助，響遊戲正式推出前安排完全版試玩，但由於360嘅光碟當時仲未到手，惟有拎隻PS3版嚟睇吓做得好唔好過單撈版本。關於《DMC4》嘅基本資料，早前都俾Game書講到爛，我都係集中講吓實Game做得好唔好！約兩小時試玩裏面，令人驚訝係所有劇情演出都係實時運算，全無Pre-renderMovie兼夾晒口形，新主角Nero為咗唔喺女友面前出醜，竟敢騎住寸過摩連奴嘅Dante猛抦，齋睇呢場懶型爭女戲已經值回票價。當然，平時同班妖魔鬼怪開片亦爽快流暢，就知開發小組花咗幾多心機去整靚啲畫面。唯一挑剔係有少少場面光源唔多合理，搞到敵人好似識體內發光咁，但呢個唔影響對成隻Game嘅觀感。
英日雙語保證睇得掂
儲存媒體進化成Blu-ray，唔使再忍受無休止嘅換碟地獄，同時容量提升亦便利隻Game可做更多嘢，例如一次過將全球唔同地區嘅內容塞晒落母碟，唔使逐個版本修正，方便到極。如今《DMC4》雖然係全英文對白，但顯示語言乃根據閣下部機自動變更，包括對白同遊戲中嘅所有選項指令，想睇原汁原味日文就自己Set番PS3個主機設定。與此同時，隨首批遊戲附送限定數量特典光碟，廠方亦好體貼咁專程加晒英文字幕，唔使大家聽唔明遊戲監製講乜咁慘啦！
動作元素歷代最強
好多人都知，當年《DMC》係創作《Bio4》時出現嘅副產品，連如今在歐美大熱嘅《戰神》都啓蒙於佢。今集儘管主角變成後生好多嘅Nero，驟眼睇白髮同緊身衫打扮與老鬼Dante相差無幾，而且兩者都係手槍配長劍殺敵，好明顯係Copy多個主角嚟做兩手準備。Nero打法上似系列第一作，比較簡單直接，但增設咗力發千鈞嘅魔爪，捉住敵人嚟撻生魚狂打，識得善用就算大牛龜都可以輕鬆收工。至於寸王Dante就沿用《DMC3》可選用不同Style嘅方式，但經過改良變成可以隨時轉換，冇上次咁欠缺彈性；當然新增設嘅格鬥武裝、「萬劍歸宗」同「喼神」更加唔講得笑。
《DMC4》迷點睇？
Anthony：PS3版都已達相當水準。係Framerate有少許唔穩定。」
Might：操作方面都算幾好，Nero似以前Dante但仍有個人特色。
雪代：雖然遲咗去訂，但玩勻試版同呢隻完成版本，就覺得400蚊係超值！」
Profile
機種：PS3、Xbox360
廠商：Capcom
類型：ACT
人數：1人
日期：1月31日
價格：$388
查詢：23661001