黎明同孫紅雷近日埋首趕拍陳凱歌執導嘅電影《梅蘭芳》，佢哋啱啱完成北京部份，近排轉場上海，日前仲喺上海音樂廳同一間公館取景。
黎明嘅戲份差唔多完成，只剩番一小部份，為咗慳時間，導演陳凱歌安排咗替身幫佢試位，黎明埋位拍完就可以準時收工。見一眾演員同導演喺片場入面時刻都表情嚴肅，尤其係陳凱歌事事要求嚴格，仲親自教演員唱戲走位，可能壓力太大，佢不時走出門口食煙。至於孫紅雷都皺晒眉，佢嘅助理就幫佢着西裝，準備隨時埋位。
打電話猛呻
另外，上星期五黎明收工後先返酒店休息一陣，跟住就去咗新天地翡翠餐廳食晚飯，點知全場爆滿，就算黎明都冇面畀，冇得打尖，佢都要等成半粒鐘。佢唔想企喺餐廳門口等，於是就黑晒面返自己架車，其間仲唔停咁煲咗20幾分鐘電話粥，似乎係向朋友呻要等位。其後餐廳安排黎明入座，佢好快咁食完就鬆人，全程都冇惹嚟食客注意。