銀行界呢排真係多新聞，除咗次按撥備係日日都有報道之外。上星期仲有三單驚天新聞、騎呢新聞，令人又嬲又笑。
驚天之事，當然係法興銀行（SocGen）變成《金融時報》筆下之ShockGen，堂堂法國第二大銀行，竟會俾一個三十一歲嘅交易員（JeromeKerviel）大炒期指，虧損四十九億歐元。凡係做過銀行嘅，都覺得冇可能。但係真的發生了，你信唔信法興嘅官方解釋？一月二十四日，全世界傳媒都追蹤呢位「克維爾」，他的名字成為Google搜尋榜第二十六名。事後解釋之一話克維爾家庭發生悲劇，女朋友與佢分手，故此佢沉迷玩期指與衍生工具，玩出大禍，正是信不信由你，要搵心理學家解釋。
騎呢新聞就係渣打外籍高層DyerAndrewSteven被控毆打女的士司機，罪名成立，判監兩個月，緩刑二年，賠償五千元。賓架打的士司機，仲係女人㖭，有冇搞錯？賓架Ｐ、賓架Ｗ等等，一致表示難以置信。有此案底，實不知以後如何再在銀行界搵飯食。我哋的確碰過好多態度不佳嘅的士司機，例如自沙田馬場叫的士去火炭火車站，司機大哥就會發吓脾氣俾你睇，我哋唯有自嘆倒霉，邊度會與呢類人一般見識吖。掌摑女司機，確實匪夷所思，渣打銀行不如請一個心理專家，為班高層開班，教導「AngerManagement」（管理憤怒）。
另一單具有教訓性新聞就係新加坡警方控訴七名前花旗銀行（Citigold部門）僱員，一共一千二百二十三條控罪，指七名被告違反新加坡銀行保密法、誤用電腦、偷竊銀行資料等等。呢七名前僱員喺二○○六年被獵頭，全部轉工去UBS（瑞銀），其中有人辭職前在花旗銀行下載客戶資料，帶埋啲資料過檔，之後又撬走咗一啲花旗客戶。唉吔，轉工為求高薪啫，人哋出高薪搶你，背後當然希望你「包生仔」，即刻帶到生意過嚟，自問無此本領者，切勿輕易過檔。根據新加坡法律，如罪名成立，呢啲花旗前僱員可能判監20年，前途盡失。賓架轉工轉出個大禍，豈止貪字變個貧！