棒棒堂前晚喺台北小巨蛋開騷，吸引咗8千幾位fans捧場，聽聞演唱會製作費要成港幣750萬，而門票平均每張只賣120蚊港幣，計落佢哋今次倒貼咗成650萬。演唱會一開始，棒棒堂成員小煜、敖犬、阿緯、王子、威廉同小傑吊喺半空出場，之後又分別吹色士風、跳跆拳道舞、巴西戰舞同hiphop，以及向佢哋偶像日本組合SMAP致敬，獻唱SMAP嘅《世界中唯一僅有的花》時，全場氣氛high爆。
魔鬼式受訓
不過，當敖犬扮型出場跳舞時，條褲個釦突然爆開，雖然敖犬好驚甩褲，但最後總算順利完成。有人話佢哋好似夾口形唱歌，但前晚棒棒堂出席慶功宴時否認話：「雖然我們沒有唱得很好，但是演唱會我們不會對嘴啦！」之前佢哋進行咗40日魔鬼式排練，見今次反應咁好，話幾辛苦都算值得喎！