全球股市噚日又再大跌，港股亦難倖免，且跌勢亦好駭人，恒指一度落到23586，大跌1535點，跌幅6.1%，尾段反彈，升番幾百點，收24053，下跌1068點，跌幅收窄到4.25%。國企同中資股受A股急挫拖累，H指大跌696點，跌幅近5%。
恒指再度下試250日線（23555）支持，好在守得住，但短期走勢好大程度受外圍影響，若能止跌回升，則小型頭肩底形態確認，後市可看高一線。噚日期指在交易尾段就有掃貨場面出現，即月期收24288，大幅高水235點，2月期收24320，更大高水267點。摩根大通指港股已跌至具吸引力水平，特別係H股，08年PE只有18倍，係多年難見的低位，亦係中長線入市的好機會。
基金重新上車必有因
噚日大市有180多隻股票（唔計認股證）上升，中國林大（910）上榜，最高1.16元，收1.14元，升7仙，升幅6.5%，成交增至7400多萬股，大行同基金收集之勢轉急，可能好快會有大動作。
去年7月底，林大股價曾高見3.20元，上周跌到1元水平，得番三分一，主要係去年底公司受不利傳言困擾，基金「借意」洗倉，令股價急挫，至於近期股價回落，則係受大跌市拖累，以公司轉型林業後盈利「突飛猛進」，今年嘅預測PE只係單位數字，股價大跌後正係低吸的難得機會。基金同大行重新上番車，公司亦趁機大手回購，必然有因。
滙豐證券最新出的一份報告，話不少中小型中資股係唔受美國經濟影響，例如污水處理、內衣、造紙和林木行業更可維持強勁的盈利增長，並推介6隻股票，林大係其一，去年12月所訂下的5.70元目標價，維持不變。
大行維持「買入」評級
另外，德意志銀行亦指林大過去一個多月來的股價跌勢，純粹係由於內地媒體的不實報道，集團林業業務基本因素並無改變，因此維持「買入」評級，目標價3.41元，預期升幅有200%！
林大由06年7月開始，升足一年，然後跌番半年，調整應已完成，升浪可以再起，初步上升目標係2元，中線可望再創新高。