公司名差唔多嘅不時都見，而且仲好容易造成誤會。華華噚日收到世紀21香港嘅電郵，內容話要同一間叫「世紀21添百利物業顧問行」劃清界線，話呢間行「利用本公司之商標及以世紀21之名義，向各傳媒朋友發表其對市況之分析……」咁兩個名又真係幾似，華華於是起吓呢間世紀21添百利嘅底。
世紀21添百利引人誤會
世紀21香港旗下都係加盟商或特許經營，唔同分店會按所在地區，喺世紀21後面加唔同嘅名，例如「世紀21源盛物業」或者「世紀21悅來登」咁，所以世紀21添百利的確好易令人混淆。
喺公司註冊處嘅資料，有家公司中文名係「21世紀添百利物業顧問行」，英文名係「Century21PimpernelRealtyConsultantLtd」，同世紀21香港嘅「Century21HongKong」勁似。華華喺報道見過「世紀21添百利物業顧問行」嘅特輯，公司電郵，跟21世紀添百利一樣，地址就係油麻地東方街一幢商廈內。
大股東係知名炒家
呢間「21世紀添百利物業顧問行」嘅大股東叫何鐵城，相信亦係話事人。呢位何生都孭過唔少職銜或公職，仲攞過世界傑出華人獎。而華華收到嘅路邊消息就話，何生喺地產界已有幾十年經驗，旗下有唔少豪宅同舖位。
睇番以前嘅報道，「世紀21添百利物業顧問行」有個何生間唔中都會接受傳媒訪問，華華唔知佢係咪同何鐵城係同一個人嚟，其實早喺舊年5月，間「世紀21添百利物業顧問行」已喺報紙出現，可能當時冇乜人留意，可能係世紀21香港嘅CEO吳啓民忍咗好耐，終於忍唔住出手澄清，咪令人誤會。
電郵：mailto:[email protected]