次按爆煲之後，花旗嗰邊又驚債券保險商唔掂，呢個發展係有迹可尋嘅，因為次按、CDO同債保產品其實係一環扣一環，火燒連環船，𠵱家終於燒到嚟。
次按撇賬已經搞到花旗銀行業雞毛鴨血，債保嘅問題影響又會點呢？搞得掂問題唔會好大，搞唔掂就慘慘慘嘞，如果啲大型債保公司被降級，銀行持有嘅債券好可能又要大幅撇賬，跟住信貸危機又會惡化，連鎖反應發展落去，真係唔敢再諗。
美股梗係唔敢睇好，咁港股呢？就算整體靠得住，美股跌得狠嘅時候，港股又點避得過？上周五美股下跌，今日港股都唔樂觀。
兗煤C輪5646：兗煤（1171）上周五收13.6元，填補裂口後升勢持續，短線或上試15元，可以買啲5646短炒，現價21.7仙，有效槓桿3.6倍，正股升上15元，5646可見30仙，正股跌穿12.8元止蝕。