近日內地多個地區受風雪侵襲，前晚在上海大舞台舉行的雪碧榜頒獎禮，就在漫天風雪下進行，冷得眾女歌手騰騰震，但楊千嬅和吳雨霏仍以單薄衣裙示人。今次頒獎禮中以黎明為大贏家，雖然去年他只出一張翻唱大碟，但仍獨掃六獎。
由於上海遇寒流落大雪，氣溫只得兩度，但眾女歌星出席「2007年度雪碧中國原創音樂流行榜頒獎禮」時繼續露臂露膊搶鏡。楊千嬅與吳雨霏（Kary）分別以入膊裙出現，看來女人認真耐寒，千嬅在後台與老闆黎明相遇，黎明關心問她可覺得冷，她笑說：「我已經凍到冇晒知覺啦！」
衞蘭努力瘦身
衞蘭（Janice）則身穿迷你裙及長絲襪，S.H.E也只是穿短袖衫，何韻詩白色恤衫外加披肩及貼身褲，她表示已將帶來的所有衫穿上身，因沒有預計天氣如此寒冷。衞蘭今次得到兩獎，她希望快些再出碟，以免被fans遺忘。對於早前陳慧嫻指她唱功好可惜太肥，衞蘭表示知道此事，又謂之前是比較曳，但從今開始會努力keepfit。
大贏家黎明雖然去年只出過一張重唱四大天王作品的《4inLove》精選碟，不過仍然橫掃六個獎項，包括全國榮譽歌手大獎、全國傑出成就音樂視像導演獎及全球華人最傑出全能藝人大獎等。他謂拍戲期間要做歌星唱歌有些不慣，又表示近期生活十分有規律，每天都是拍戲吃飯睡覺。
古巨基發老姣
問黎明拍完《梅蘭芳》後可會回公司處理唱片事宜？他說：「做得少又話人氣唔夠，做得快又話冇新鮮感，等啲歌迷去決定，做得快同慢都有壓力，做歌手有時要自己承受番啲嘢，我有時要休吓息，唔係機械人。」談到近日香港股市大幅升跌，他說：「我冇買股票，咁推介上海人去香港廸士尼玩過山車，比較穩陣。」
此外，古巨基一身粉紅西裝出現，他笑說早前特別到日本入貨，但他被取笑大地回春，不過有爛gag王之稱的他搞笑說：「係妙手嗰隻喎！」至於張敬軒因為工作忙碌，已兩日不眠不休。
採訪、攝影：丁寧
2007年度雪碧榜部份得獎名單
-最受歡迎男歌手-
內地：張敬軒
香港：古巨基
-最受歡迎女歌手-
香港：衞蘭
-亞太最受歡迎女歌手-
楊千嬅
-全國至尊金曲大獎-
S.H.E《中國話》
-最佳演繹女歌手獎-
香港：容祖兒
-傳媒推薦大獎-
香港：古巨基、何韻詩
-全球華人最傑出全能藝人大獎-
黎明
資料來源：雪碧中國原創音樂流行榜