每年臨近農曆年，華華總會收到唔少大小企業嘅利是封，今年最令華華有意外驚喜嘅，係一向創意多多嘅維珍航空。
維珍航空寄嚟嘅賀年卡，以至利是封，都用舞獅做主題，仲叫「出獅有名」，最搞鬼係附有一份勞作仔，係一張舞獅圖案嘅平面卡紙，只要將舞獅剪落嚟，按照圖示就可以摺成一隻顏色鮮艷嘅立體紙獅子。華華見到咁鬼馬，都即刻跟住摺咗一隻，雖則要花少少時間，但就唔算複雜，而且隻紙獅子嘅畫工都幾細緻同認真。
張賀年卡就有舞獅嘅招式，仲有埋介紹，話舞獅係要兩至三個人合作，先會舞得好睇。唔知貪玩嘅主席布蘭森會唔會喺新正頭拜年時，自己出嚟舞吓獅呢？