農曆新年將至，唔少發展商都部署過完年才推盤，新盤交投非常淡靜，就以上個禮拜六、日為例，一手市場只係錄得45宗成交，比對上一個周末同期嘅282宗，銳減八成幾。
市場雖然冇乜焦點盤，不過一手貨尾仲有大把選擇，好似大角嘴就有兩個貨尾新盤，包括君滙港同一號銀海，趁假日一次過睇晒，睇完行十零分鐘到附近奧海城商場，當日商場有賀年活動，最啱一家大細參加。
商場請咗一班活潑好動嘅鼠鼠特攻隊，為大家掘出金色芝士，機動嘅鼠鼠仲識得舞獅、燒炮仗同埋表演空中飛鼠等活動；此外，同場售賣各類健康嘅有機年宵美食，例如日式低糖年糕、有機合桃、南瓜籽等，仲有多款賀年禮盒，營業時間更延長至午夜。