黎耀祥公認搞笑兼好戲，喺《秀才愛上兵》度扮封口師爺，有乜想講都係寫紙仔，再靠鬼馬表情搭夠，出位過Bob頭Yumiko多多聲。當祥仔揸住架夢想號愛車開篷保時捷，忽然大老爺上身，收起笑臉，不徐不疾地享受着一段揸車體驗，彷彿將地老天荒的認真掛在臉上，表情Cool到爆，可以話從未見過咁Man咁型嘅黎耀祥。大家睇完今日呢輯相，你都會相信
坐喺呢隻青蛙上，真係可以變王子！
記者：梁美甜
攝影：林栢鈞
髮型鳴謝：IvanLee@Headquarters
迷人笑窩冧老婆
祥仔好尊重太太，事無大小都會同佢商量，喺現場等埋位影相時，就被攝影師捕捉到呢刻溫馨SnapShot。祥仔笑起上嚟出奇地迷人，看得到太太亦甜在心頭。當然，有黎耀祥嘅地方點會有冷場？大老爺就即場附送Gag一個：「有次揸車去到拍攝場地，點知成個車窗跌咗落嚟，為免八卦人士搞架車，就將無窗嗰邊泊喺山邊，再當住咁多人面前鎖車扮無嘢囉！」空城計成功證明祥仔好戲，佢講時嘅生鬼表情更引得我哋哄堂大笑。
夠爽！引擎聲引你踩油
保時捷Boxster屬雙座位跑車，由Showroom取車之後，就讓祥仔揸到拍照地點，等佢親身感受一下DreamCar嘅性能。雖然天雨路滑，不過祥仔駕駛得相當謹慎有技巧，快慢調度得宜，好明顯佢對呢位夢中情人已有相當了解。試完一段路後，祥仔一下車已急不及待地猛讚：「聽到副偈轟轟聲，好想俾油去，真係跑車至有呢種感覺……好夠力，貼吓油門就去，操控性又強，中置引擎唔難揸吖……座椅仲好舒服，無以前咁硬，真係VeryGood！」咁讚法，雖然係架車啫，但難免老婆會生醋意噃。
Boxster引擎搭配獨家VarioCamPlus技術，令車輛輸出更大動力及低速扭力時，維持引擎運轉順暢，中速時能加強扭力，喺高轉時更能輸出更大馬力，令加速敏捷、運轉順暢。另一項PSM系統，就能令車子以最佳穩定性同最佳速度行走，能有效提升行車嘅循迹性，難怪祥仔話MR車唔難揸啦。
體貼！買青蛙要顧家
喺Showroom祥仔見到Cayman話鍾意，全因新車線條同外形大方得體，一時吸引佢老爺目光，但講到DreamCar都係揀番Boxster，原因好簡單：「我未擁有過開篷車。」開篷都有好多車系有，何以偏揀Porsche呢？「由細到大只認為寶馬、Benz同Porsche係頂級，嗰時覺得Porsche似青蛙、Benz較老土，唯獨覺得寶馬最犀利，所以大個就買咗部318，之後仲換部馬力勁啲嘅328㖭！不過今時今日，反而最鍾意呢架PorscheBoxster同Cayman，隻青蛙越睇越靚仔……」
祥仔為人踏實，買車以實用性為首要，其次係觀感，而Porsche絕對係觀感取勝，加上自細覺得係勁車，所以就歸類為可望而不可有嘅DreamCar一類。以今時今日嘅能力，要擁有呢部DreamCar都唔難吖！「有多餘錢買番部都好喎，不過香港路面又唔係咁啱揸……」想要又唔想要嘅矛盾心態全因有了家庭，考量嘅仲有太太及囝囝，「若果老婆都鍾意又唔同。」體貼到暈！
夠Sweet！兩仔爺講車經
試車當日太太Julia亦趁空檔陪祥仔同來，二人穿着皮褸一身情侶裝束，好不溫馨。「老公佢真係一個踏實嘅人，咩都諗過度過。」Julia趁空檔補充道。我知，所以祥仔為咗太太同囝囝坐得舒服，現時揸嘅就係凌治ES300房車及Subaru旅行車Legacy2.0，貪佢哋實用又舒服，而且操控性強，祥仔果然言行一致。唔知係咪遺傳，囝囝正橋亦非常熱愛汽車，甚至可以睇尾燈都估到係邊一款車，Julia更直言「老公同囝囝感情好到連我都妒忌，兩個人可以一齊睇車講車興奮到手舞足蹈，沒完沒了！」所以二人拍了不少超跑照片返去俾囝囝睇囉！
PorscheBoxster（ModelYear2008）規格表
引擎：2,687c.c水平對向6汽缸
馬力：245hp/6,400rpm
扭力：273Nm/4,600-6,000rpm
傳動：5前速TiptronicS半自動波
驅動：中置引擎，後輪驅動
查詢：PorscheCentreHK（29262911）