手執內地3億幾流動電話用戶嘅中移動（941）董事長王建宙，正喺瑞士出席世界經濟論壇，佢日前接受《法新社》訪問時，自爆隨身有4部手機，之前去到5部咁多㖭。嘩，華華見啲人最多都係得兩部啫，一人用四五部電話嘅，除非係八折的士大佬，方便接生意吖嘛。
外國嘅高管人員，多數都係一部「藍莓」加一部手機，好少會好似王建宙咁周身機。若然佢自己揸車，唔知會唔會都好似八折的士大佬咁，將啲手機放晒喺軚盤前面，方便接聽呢？話晒中移動做生意牽涉嘅銀碼，絕對唔係的士大佬咁一百幾十上落咁少嘢，梗要跟到貼啦，最近佢哋正準備同蘋果傾單刁，睇吓係咪可以將iPhone帶到內地。
語出驚人 嚇窒西人
做得董事長呢個位，除咗自己跟到貼，亦要俾人跟得貼，有乜事都要畀公司員工即時搵到你。不過咁，喺內地，只要有部手機，就一定搵到你，因為流動電話用戶嘅行蹤，都會通過流動電話，聯繫到當地嘅資料庫，王建宙喺論壇上就語出驚人，話掌握晒客戶嘅資料，仲話會根據每個客嘅個人資訊，提供廣告及服務云云。
透過電話可以追蹤一個人嘅行蹤，喺21世紀本嚟唔係乜嘢秘密，只係佢一啲都冇避忌咁話：「我哋知你係邊個、你喺邊度。」大家都知外國人對個人私隱呢家嘢睇得幾重，王董咁講嘢，當然嚇親唔少外國行家，以為內地嘅電訊客戶私隱冇乜保障啫。
不過佢之後補番句，話唔會畀客人嘅資料隨便流出──只會當內地保安官員要求，先提供資料協助──呢句只有越描越黑，真係唔講好過講咯。
電郵：mailto:[email protected]