上個禮拜日晚、禮拜一凌晨，即係全世界都未知打後五個交易日將會有幾咁刺激之際，孫柏文喺屋企睇電視。1月20日當晚，翡翠台重播電影《旺角卡門》，不過唔知點解，我隻右眼一路眼眉跳。跳得最厲害一刻，就係睇到張學友飾演嘅「烏蠅」，講咗句：「我寧願做一日嘅英雄，都唔想做一世嘅烏蠅。」唔通真係左吉右凶？
輸百億仲有肥雞餐
上個禮拜股市動盪，好多人都歸咎於法興輸562億嘅事件。上個禮拜我話過，根據法興自己出嘅新聞稿，今次事件得到揭發，係因違規交易員克維爾（Kerviel）自首。我仲要冇經過大腦咁問：「輸49億歐元就自首，點解唔等到50億呢？可能會反彈，輸少啲喎。」
更撲朔迷離係法興唔拉人，淨係話：「呢個交易員已經被停職，我哋亦已展開解僱程序。」其實諗深層，輸49億歐元先至自首，可以用博弈論嚟解釋。
以前都話過，你欠銀行1000萬，還唔到就係你嘅問題。你欠銀行10億，還唔到就係銀行嘅問題。你欠銀行1000億，還唔到就係中央銀行嘅問題。
銀行業永遠都係資本主義下，最計劃經濟嘅一行，只要個鑊夠大，出事單位就可以卸鑊。
輸公司錢一樣，輸公司1000萬，你就死。輸公司10億，你公司就大鑊，不過董事局仲會請食肥雞餐。輸562億，聯儲局就減息0.75厘。
老作交易為留生路
咁點解要輸562億先至自首？因為你要做到，公司唔放你一條生路，公司就要執笠。當你違規嘅方法，係老作咗好多交易，公司要解結，首先一定要知邊啲交易係真、邊啲係流。輸562億，你就可以同公司講：「保證我冇法律責任，我就講你知邊啲交易係流嘅。如果唔係，你哋逐個打去問啦。」
如果法興大規模打去啲同行問：「我哋有冇做過交易？」事件一定張揚。到時拆倉就會難上加難，公司就要執笠。所以當你可向公司話：「放我一條生路，就放你一條生路。」你就會冇事，真係輸少個億都唔得。
最後，因為就算啲交易贏錢佢都冇得袋，所以好多人估Kerviel嘅動機。我估，可能佢寧願做一日嘅英雄，都唔想做一世嘅烏蠅。
金手指網誌： http://phatdat.blogspot.com