大市上周大幅波動，一向波幅較大市為高的中資股，波動更勁，H指單日升幅及跌幅往往較恒指為大。不過，中資股近期頻頻有好消息，繼銀行股相繼發出盈喜之後，其他中資股亦頻見盈喜，傳統基金或會重估中字派嘅投資價值。
中興交投疏較難炒
經營造船業務之廣州廣船（317），及電訊設備商中興通訊（763）上周五分別發出盈喜公告，其中廣船預計截至去年12月底止年度，按中國企業會計準則編製之淨利潤，增長逾兩倍，估計達8.8億元。廣船去年股價最多升了逾5倍，高見68.50元，主要係受惠造船定單勁增，但目前有迹象顯示全球航運業進入低潮，廣船往績係好，前景卻有陰影，未必太受芬佬歡迎。
反而中興話晒係電訊基建股，又有國內電訊業重組支持，呢隻盈喜股應較廣船有諗頭。中興預計，去年全年按中國企業會計準則編製之淨利潤，增長50%至70%，估計最多達13.7億元人民幣，而上年同期淨利潤為8.07億元人民幣。
中興雖係好股，惟交投一向較疏，股價過去一年大致在36至37元水平徘徊，跌市會輸少啲，而升市則無佢份，揸足一年唔使輸，卻回報不大。揀同業股，增長前景較佳者，可以留意中通信（552），爆炸力雖唔及增長股，但股價總算層層而上，屬進可攻退可守之股份。
新股縮沙吼半新股
繼昌盛中國（1863）成為股市波動第一隻「犧牲」的新股後，茂業百貨（848）亦延期上市，昨日又傳陽光能源（757）暫緩上市計劃。新股遇冷鋒，相信仍會有唔多出名嘅股仔縮沙，新傳媒（708）無懼市況波動繼續招股，應係異數。不過，參考中材（1893）及中鐵（390）跌市招股都可以有咁好表現，證明有基建概念嘅大隻嘢仍有市場。呢批新股招股時，半新股曾有一浸沽壓，𠵱家大部份唔上，係咪有利半新股炒番一轉？