我求大俠讀書嗰陣成日參加「饑饉30」，冇啖好食，但係都覺得好有意義。紐卡素新領隊基瑾近排就變咗「饑饉」，上周六對阿仙奴前後30幾個鐘頭，好似入咗非洲窮人國咁，領略到非洲人極端嘅生存環境後，本來凹陷嘅雙眼更冇神，肚腩亦脹到成個飢童咁，真可憐！
舒利亞變臉拒做副手
基瑾由英國時間上周四深夜開始變「饑饉」，話說佢同前紐記「大哥」舒利亞見面傾足4粒鐘，期間落盡嘴頭、聲淚俱下（幾乎），想邀請對方擔任副手。點知舒利亞對住傳媒一副義氣仔女面口，對住「饑饉」竟然牙痛咁聲一口拒絕。
又難怪「機會主義者」舒利亞變臉嘅，紐卡素前排聯賽先被曼聯大炒6蛋，又點肯咁笨同你捱呢？你估真係食得飽得滯，參加「饑饉30」當減肥咩？啱啱上周六英足盃又以0:3不敵阿仙奴出局，「饑饉」現時咁嘅慘況，真係連飢童都不如啊！
活基治轉軚去熱刺
成績冇起色都算啦！最慘係賽前玻璃腳活基治居然轉軚唔去紐卡素，打算加盟「大會」熱刺。搞到腳軟嘅「饑饉」，連食兩隻檸檬後幾乎暈倒。正當佢以為否極泰來嘅時候，密雲嘅天空突然傳來雷聲，原來低處仲可以未算低……
話說對阿仙奴賽前，班紐記球員好期待「饑饉」會有精闢戰術擊敗對手，點知佢話：「阿仙奴傳送一流，要贏波就要傳波傳得好過對方！」不過死球等具體戰術一句都冇提到，聽到班球員你眼望我眼：「咁即係點嗎？」據報經此一役，有個別球員已經唔再信任佢。
我求大俠唔係踢波出身，都知道要避開對方長處，充分利用自身優勢。呢個「饑饉」居然叫球員同阿仙奴鬥傳送？加埋馬田斯等非洲兵抽去打非國盃，今次淨係輸3粒都偷笑啦！希望基瑾捱過呢30幾個鐘頭後，頭腦清醒番，唔係紐記就慘啦！