香港地區人大代表選舉，喺一月二十五日早上舉行，五十人爭三十六席。選舉前一日，喺地鐵站撞到一位愛國人士B，愛國B話要同左丁山傾幾句，點知真係傾幾句，佢嘅手機就響起，五分鐘之內響咗五次，一啲係短訊，一啲係電話。咁多外來干擾，點傾偈呀，左丁山想同佢拜拜，轉身鬆人。愛國B見咁樣，索性熄機，認真同左丁山傾幾句。正經事講完，左丁山問佢點解如此多短訊、電話，愛國B話：「聽朝投票選人大吖嘛，我就係其中一個選委嘞，有權投票，故此咁多人搵我，希望我投佢一票。聽日投票完畢後，就會耳根清靜㗎嘞。」
原來愛國B係選委，失敬失敬，多口問佢如何投票，佢話：「今年行新辦法，一張選票名單內，一定要選足三十六人，一人不能多，一人不能少，否則就成為廢票。好易投票啫，五十人之中，泛民派唔選，一啲無厘頭人物唔選，所以選唔到嘅人士只好怪自己，點解咁易中都中唔到。」
騎騎，中唔到未必係自己錯失，而係選民早有默契，早有選舉工程，知道點樣投票，「民主集中制」就係咁解。有高人集中盤算誰人應該當選，然後透過民主方式投票，集中於三十六至四十人身上，包保得高人垂青嘅候選人一定選中。呢個制度好就好啦，未出閘已經知道邊隻馬會贏，但有一個問題必須解決，就係梁秉中教授唔可以再名列第三十七名，做第一候補！過往兩屆，梁教授「事有湊巧地」連續名列第三十七，又湊巧地連續兩屆都有港區人大死於任內，等梁教授可以補中，咁邪嘅嘢，點可以俾佢再發生呀？
本文見報之時，港區人大選舉已經揭曉，好多人會彈冠相慶。愛國B話以後希望民主唔好咁集中，現行制度令到好多真正老愛國都唔夠膽報名參選，無知名度、非「財」俊人物者，即使一貫愛國亦完全冇機會。與愛國B拜拜之後，想起一句名言：魔鬼在細節裏，他日2017年普選特首，叫做好民主，但如何選出候選人？普選之路好艱險。