暴劫場面　堅到嘔

暴劫場面　堅到嘔

家陣好多大製作都係靠電腦特技，十萬大軍有九萬五人都係水份。本周新到《暴劫現場》的大場面就真材實料，內容講述沙地阿拉伯的美國石油公司職員宿舍區受到恐怖襲擊，死傷慘重，以占美霍士為首的聯邦調查局小隊抗命前往當地調查，受到百般阻撓，最後也成為恐怖分子的目標。雖然或多或少都有大美國主義，不過製作認真、卡士OK，都算值得收藏。睇完後第日有人同你講國際反恐嘢，起碼你都有啲嘢噏吓。　

記者：洪偉順

■穆斯林教徒死後是不容許被異教徒觸摸的。

■想搵人幫手但冇人識聽英文，惟有靠身體語言。

■恐怖分子扮警察吸引人群，跟住自爆增加死傷率。

■鏡頭放在主角身後拍特種部隊攻堅，營造現場感。

■主角殺完啲恐怖分子，再畀小妹妹食糖果。

■巷戰時主角們只能乖乖地躲在車後面等運到。

幕後花絮：演員拍到嘔

《暴劫現場》最正係開頭10分鐘美國人家眷村的恐怖襲擊，以及最尾30分鍾的巷戰重頭戲，不過尾段高速公路的連環撞車一節都值得留意。Bouns內有一段解構撞車的拍攝準備及過程，原來唔夠5分鐘就玩完的撞車一幕，工作人員在一年前就已經開始做準備，大大話話用咗3至4種真車做物理測試，計算撞完車後在空中打幾多個觔斗、落地方向之類；甚至Crazy到在車上裝上軍用迫擊炮向地下發射，務求令部車彈得更高、轉多兩個圈。雖然戲內有特技人員幫拖，不過啲演員都唔好得過去邊，皆因撞車後在地下反轉咗仲要不停旋轉磨地，主角們全都要親身上陣。雖然一Take過，不過高速旋轉4分鐘後，配角積遜比曼一爬出車就嘔，睇見都可憐。

■起樓用嘅怪手做旋轉，部車轉幾多圈都冇問題。

■導演同工作人員即場在馬路用玩具車模擬。

■電腦CG事先模擬撞車情景，拍時一Take過。

八千萬美元搭景

《暴劫現場》重頭戲之一就係巷戰一幕，敵人喺兩邊大樓的天台、露台居高臨下用槍掃射，下面啲人真係好唔着數。咁嘅場景令筆者諗起以前玩嗰隻電腦遊戲《CounterStrike》（反恐精英），好多人會收埋自己，跟住放冷槍，真係防不勝防，好卑鄙呀！成套戲都冇用CG，一槍一炮都是實物道具，連槍戰地蘇瓦廸區也是仿照當地街道在美國亞利桑那州搭建出來，不惜工本。

■恐怖分子的標準「制服」，頭巾加PRG火箭炮。

■小圖是沙地阿拉伯蘇瓦廸區的實景，因不能在當地拍攝而移師美國本土，由電影公司自己搭建。

大玩鑑證實錄

套戲主要講主角所在嘅美國調查隊要去事發現場作鑑證調查，所以戲的中段鋪排調查過程，並一步一步走向真相。雖然是文戲所在，但一點也不沉悶，加上這幾年鑑證劇集好Hit，抽絲剝繭追求真相的刺激感一直都有市場。而各主角的調查場景如印手指模、收集碎片等動作，做得甚有說服力，逐步帶出邊個係真正敵人！觀眾終於知道發生咩事，否則邊個打邊個都唔知。

■泥漿入面有大量證據，惟有用手入去摸索。

■女主角珍妮花正仔細地幫死屍打手指模。

■正在重組爆炸物，每一件碎片都是在屍體找到的。

本周3區排行榜

1《異種4》（未經刪剪版）
2《塚愛》
3《安娜與安娜》
4《情迷窩心批》
5《巴黎愛漫遊》
6《超能特工狗》
7《暴劫現場》
8《強復者》
9《美味不設防》
10《生化危機3：絕種生還者》

查詢：DVDPro（23326326）