地產商叫人唔好買樓，華華真係冇乜聽聞。今個月初，大陸地產發展商萬科主席王石接受訪問時，竟然叫人唔好心急買樓，可以三四年後先買喎，即時引嚟好大迴響。噚日接受《新浪網》訪問時，佢進一步叫人40歲前唔好買樓，可先租樓住喎，咁都得？
月初佢嘅論點係，「從起樓質素考慮，大陸住宅質素會不斷改善；其次，三四年後你都成為中產人士，滾存嘅儲蓄相信能買得起樓，如果買唔起，就係市場問題，市場一定會遭懲罰。」
至於叫人40歲前咪買樓嘅原因係，「雖然擁有一間屋可以有安全感，但亦係一個包袱，你往往因為有咗一層樓，唔能夠輕易轉換工作，佢會成為你嘅包袱。」唔單止咁，佢亦建議結咗婚嘅後生仔女，都唔好咁快買樓，可以租住先喎。不過，在商言商，王石都話，如果真係要買樓，梗係要買萬科啲樓。
王石呢種「醫生叫人有病唔好睇醫生」嘅出位言論，其他地產商當然唔like，好似SOHO中國（410）嘅潘石屹就批評佢講嘢太武斷。而王石係咪想贏好感，做宣傳就唔知喇，不過點都好，買樓係人生重大決定，聽多啲意見係好嘅。