看過上星期德能的〈波飛〉一文後，第一個反應是：如果德能是搞波的人，或者搞波的人會找德能幫手，球迷便幸福了！
德能在文中道出球迷的心聲：賀歲波的波飛太貴！香港球迷一向精明，但絕不孤寒，記得西班牙皇家馬德里襲港時，連2,000元的貴價飛亦被瞬間搶光，無他，因為現場欣賞「6條煙」，平均「1條煙」只需330元；居高臨下的觀眾，單看「萬人迷」碧咸七旋斬，平均每一斬只是80蚊，斬多兩斬再跌價，絕對超值。所以買不到正價飛，便二話不說幫襯炒飛；這表示，只要是好戲碼，票價再貴我們也豪得起！
在足總公佈賀歲盃球隊名單及門票定價當日，一位會看歐洲4大聯賽，但算不上球迷的朋友說，波飛太貴了，入場不化算，不過她慣了農曆新年到大球場趁熱鬧，所以問我可否拿到免費飛，但是最後她還補上一句：「若果拿不到也沒關係，反正戲碼不吸引！」可見賀歲波對香港人來說，並非小事，但有時賀歲波的戲碼，卻像看輕了香港人！
去年回歸盃，戲碼不俗，加上四叔請睇波，大家雙倍滿足，既然知道賀歲波因檔期問題令球隊吸引力下降，就更應該以開心價益街坊！新正頭人人都想喜氣洋洋呀！
文：小飛勤
mailto:[email protected]