18歲學人炒股嘅年輕人香港都唔少，但內地《現代快報》搵到個18歲已經做股神嘅年輕人，呢位叫王昊嘅年輕人9歲已開始炒股，至今已有9年經驗，因為炒五糧液呢隻股「身家」漲咗12倍。最近仲被高中學校保送去清華大學，佢話希望第日做同股票有關嘅工，因為起薪點高啲喎。
王昊嘅爸爸因為打工嘅公司上市，分得2000股認股權，9歲嘅王昊就喺多年儲埋嘅利是錢同零用錢度，攞470蚊人仔，向爸爸買咗100股認股權，到2000年用1600蚊賣出，賺咗1130蚊。
同年佢借爸爸個名開股票戶口，用3000幾蚊買五糧液股票，家陣已變成4萬幾銀，8年間增值12倍。
王昊話睇過五糧液嘅年報先決定買，雖則喺高位入貨兼一入市股價就跌，佢依然冇諗過賣，終於等到上年牛市。佢仲向爸爸解釋，中國人家庭聚會定會飲酒，而大家收入高咗就會飲好酒。好多淨係識炒冧把嘅師奶阿叔，真係要向佢學吓嘢。