鄭元暢同林依晨自《惡作劇之吻》後竄紅，近日台灣熱播續集，香港亦有不少年輕朋友為《惡吻》而瘋魔，集集追，台灣播出6集，網絡上已有接近8萬人下載！睇過《惡作劇2吻》嘅人都會留意到套戲嘅親熱位、溫馨位同Kiss位多到嘔，集集錫一錫，結果越吻越熱，傳聞兩人床戲更被刪除，因為太露骨。不過台劇上位，據Fans及台灣偶像雜誌舖老闆所言，是由於港星已死、港劇沉淪！
記者：陳諾堯
攝影：林栢鈞、黃子偉
3大偶像劇王網上大熱
對於追開台劇嘅朋友，一定走唔甩最近勁Hit嘅三套，包括由小綜鄭元暢和林依晨飾演的《惡作劇2吻》、周渝民和侯佩岑的《美味關係》、Hebe和賀軍翔的《鬥牛‧要不要》。以上三套台劇都係由台灣人氣靚仔靚女擔正，又有飛輪海和李威等配角，睇頭十足。三套都未出碟，於是不少港人以BT下載或上YouTube睇，就以「豬豬」網為例，當中以《惡作劇2吻》可謂最離譜，出咗6集就已經有接近8萬人下載！《美味關係》和《鬥牛‧要不要》都有超過5萬人下載，以上只計單一網頁，真正數目相信更為龐大。但如果大家真係咁鍾意自己個偶像，想睇就不如等出DVD，又或者上YouTube過吓劇癮先，Download就咪喇！
「香港明星唔值錢！」
「香港明星唔值錢！偶像派得個樣睇得，其他乜都唔得；實力派又唱得做得，但係唔睇得，試問香港有幾多個劉華呢！」專賣台灣人氣偶像雜誌的陳先生講：「𠵱家香港明星唔值錢喇！佢哋啲嘢都冇人搵，唔賣得，一個二個都轉晒去捧台灣偶像，起碼人哋唱得、睇得同做戲都得。香港偶像好難紅，冇機會就唔會紅，唔似得台灣一套劇集爆出即紅，好似《惡作劇之吻》嘅鄭元暢同《鬥牛‧要不要》嘅Hebe咁，呢排最多人搵佢哋嘅嘢，視帝視后都係呢兩個㗎喇！」
Uwants論壇力撐《惡吻2》
《惡吻》第一集已成功令香港的台劇粉絲瘋狂，但今次續集仲勁，淨係個吹水區已有多過8萬人，極大部份都是讚不絕口的留言，就連平時冇煲開劇的朋友們都話會睇唔停。當中emilymeimei話佢好少煲劇，但一煲惡作劇之吻就被整套淹沒！仲話小綜好靚仔，情節同題材都好有趣。
Fans套套追：港劇太老套
Beverly：「我3年前開始睇台劇，幾乎套套追，通常都係上YouTube睇，睇唔到至Download。我本身超愛鄭元暢，所有有鄭元暢封面或資料我都會買。台灣同香港歌手已經冇得比，台灣嗰啲又唱得又跳得又識做戲，節目又好睇。
講真，香港冇劇集好睇，好似無綫咁，之前8:30am套《兩妻時代》同9:30am套《建築有情天》都係同一班人做，又係陳國邦同楊婉儀，淨係得閒轉吓啲主角，但配角一樣！一啲新鮮感都冇！」
ze：「我近排上YouTube睇緊《惡作劇2吻》，集集追。之前追開《黑糖馬奇朵》，因為鍾意棒棒堂，我通常Download晒先一次過睇。我覺得台劇人同景都靚啲，拍攝手法同劇情又有創意，相反我唔會睇香港劇集，無綫劇集又悶又老套，唔使睇都估到劇情。」
街訪：鄭元暢+林依晨受歡迎
Cathy：「我一向都睇開台劇，香港劇集好少睇，𠵱家睇緊《鬥牛‧要不要》，因為我鍾意S.H.E.，咁有Hebe的一定追！」
陳先生：「睇緊《惡2》同《換換愛》，因為最愛楊丞琳。我覺得台劇比較啱青少年睇，題材啱我哋啲。」
阿欣：「我冇睇開台劇，因為電視冇得播，我又唔會去Download，同埋我都係最鍾意容祖兒。」
阿Man：「我睇緊《惡2》同《鬥牛‧要不要》，鄭元暢同林依晨我都支持，自己鍾意黑澀會。台劇嘅劇情同人物角色好好笑。」
Miko（左）：「睇緊《惡2》，我會話林依晨係視后。」
Suki（右）：「睇緊《惡2》同《鬥牛‧要不要》，因為有Hebe。」
Fabee（左）：「追緊《惡2》鍾意鄭元暢。香港冇乜青春劇，之前得Y2K，𠵱家全部老餅，迫住睇台劇喇！」
Yume（右）：「睇緊《換換愛》同《惡2》，覺得台灣多新嘗試，唔似得TVB，紅嗰啲人先有劇拍。」
查詢：楓森社（23328568）
旺角彌敦道582-592號信和中心2樓222A舖