老闆Ｔ係惡佬明嘅老友，經惡佬明在馬場介紹認識。星期五，老闆Ｔ打電話嚟大發牢騷：「你識得咁多賓架，唔該你同我提醒佢地，銀行服務以客為尊；唔好以為淨係猛咁花錢賣廣告，搞馬拉松，將間銀行分行裝修到又綠又白好輕鬆咁款，就可以吸引與留住啲顧客，唔記得咗乜嘢叫做服務。我呀，啱啱去完台北返嚟，就收到銀行退票通知，搞到我冇晒面。我做生意二十年，從來冇試過退票，啲供應商收到我嘅支票，猶如見到現金。我的商譽需要二十年建立，但一張退票就足以摧毀我二十年嘅努力，你話唔嬲就假。」
做乜畀人退票吖？原來老闆Ｔ去台北之前，喺珠寶行買咗一件首飾送畀人客做尾禡聚餐抽獎之用，寫咗張私人支票找數，次日就上機。入到台北酒店房放低行李，手機已有留言叫佢打電話搵銀行，於是佢立即回電，但銀行冇人聽，大概已經下班，職員走晒啩。後來佢搵自己夥計問：「銀行有冇打電話去公司搵我？」夥計話：「有呀，但我地唔知係乜嘢事。」老闆Ｔ諗諗吓，唔通自己張支票出錯，或者支票戶口唔夠錢？於是再打電話去銀行，仍然冇人聽，只得電話錄音留言，大意話如果支票有問題，請銀行支付咗先，自己返嚟會立即入票。
結果冇人理，兩日後返到香港，珠寶行打電話嚟追數：「Ｔ先生，銀行彈咗你張票，唔該嚟舖頭找數畀現金得唔得。」嘩，冇晒面，老闆Ｔ查清楚，自己喺銀行嘅私人儲蓄戶口有七位數字，支票戶口嘅錢唔夠六萬，支票銀碼係六萬幾，竟然畀銀行彈票，嬲到頭頂出煙，大罵銀行不是。哎吔。現今銀行分行可能（一）人手不足或；（二）經理經驗不足，一切依章辦事，電腦話彈票就彈票，理得客戶係邊個？彈完仲立即收埋手續費㖭。左丁山做銀行年代，碰到同樣情形，現鈔部（CashDepartment）主任一定拎張人客支票上去貸款部搵一位貸款主任簽名核准付款，避免彈票，得失大客（例如老闆Ｔ一類人），左丁山就曾簽名批准付款好多次。𠵱家時代唔同咯，電腦大晒，人腦第二，人客唔順氣嘅，close戶口可也。