港台尚未蓋棺，資深傳媒人梁儒盛噚日試作定論，佢噚日喺新書《第一時間第一眼》發佈會上，同時發表一篇名為「香港電台敗在誰的手裏？」嘅文章，既痛心港台淪落、衰敗，同時警告煲呔政府如果要一刀切摺埋港台，就猶如苛政猛虎，港人要小心。
梁儒盛早年喺多份報章工作，1981年起加入港台，曾經參與製作唔少高水準節目，其中《城市論壇》及《鏗鏘集》𠵱家仍然長做長有，叫好叫座，佢亦係《頭條新聞》第一任監製。作為老大哥，睇見港台近年出現唔少負面新聞，梁儒盛自然係痛心疾首。
佢形容港台近十年之所以備受港府部份高層同北京飼養嘅「鸚鵡」奚落、謾罵，皆因編輯方針無法保持中立所致。梁儒盛又批評港台行政管理錯漏百出，先後有員工被告上法庭，公營廣播檢討委員會又當港台冇到，至於朱培慶被娛樂記者「正法」，就令港台嘅處境更為不利。
不過，講到最後，梁儒盛強調港台嘅責任，唔應該由員工全部承擔，煲呔政府更唔應該以「冇眼屎亁淨盲」嘅心態將港台摺埋。梁儒盛警告，煲呔如果眯埋眼摺埋港台，將來一樣會以同樣專橫手段治理政府，對港人禍害更大。