公民黨湯家驊（Ronny）噚日上港台，被問到佢同大律師公會主席袁國強、律政司司長黃仁龍嘅關係。Ronny話，袁大狀曾帶過佢囝囝上北京玩，「我個仔叫佢做Uncle，關係好親密。」Ronny話，一直都唔想用長輩訓示後輩嘅方式溝通，但今次袁國強接受中央用以統戰嘅政協職銜，唔理公會主席獨立身份，搞到佢焗住出手，令佢好痛心，「我相信呢個係我失敗，唔係佢失敗。」
講起黃仁龍，Ronny話當年喺外國讀完書，中文退晒步，仁龍請纓教佢寫中文，佢至今都好感激，但對仁龍過去一年嘅表現，Ronny坦言感到失望，因為佢喺好多人權法治議題都冇為市民發聲，「佢做嘅效果同梁愛詩相等。」