賭王何鴻燊有一大堆銜頭，全國政協常委、葡國大十字勳章勳爵、英國O.B.E、羅馬教廷劍袍爵士、法國騎士勳章、日本瑞寶勳章，噚日新添一個澳門大蓮花勳章，係澳門人最高榮譽，三太、四太同一眾子女都出席頒授儀式。好多外面嘅人亦都爭住恭喜佢，仲喺報紙刊登全版廣告，名單上出現唔少何生捐過巨款嘅香港大專學府同埋用緊公帑嘅志願機構，好似理大、城大、公開大學，最畀面係港大，除咗用港大何鴻燊校友挑戰計劃名義外，徐立之係唯一見報嘅校長。有大學界人士話，呢個廣告係由何生旗下嘅信德集團出錢，獲邀者只要有興趣，奉上刊登名字就得嘞。都係何生班僱員最醒目，識得咁樣𠱁老細開心。