問世間情是何物？八方噚日打開報紙睇到一則尋人廣告，廣告上係一幅中年男人相，於是打電話去八吓，點知發現背後原來係流行曲《愛得太遲》嘅真人版故事，主角係36歲嘅台灣女子黃雨晴，佢來港係希望尋回曾經深愛自己嘅男人。
黃雨晴同八方講，十幾年前佢到美國南加州大學讀書，喺圖書館邂逅高大威猛嘅內地俊男Dafe。雨晴話最記得Dafe問佢個名點解又雨又晴，佢咁答：「因為雨過總會天晴。」可惜雨晴當年只希望嫁畀醫生，過穩定富足生活，所以放棄了Dafe，令她抱憾至今。
登報尋人出重酬
回頭已是百年身，雨晴唔肯講自己呢十幾年點過，但佢話自己如今獨身，而且一直對Dafe念念不忘。近半年從朋友口中得知Dafe嚟咗香港工作，雨晴已經來港尋人數次，無奈佢唔知Dafe中文名，只有一張照片及記得對方39歲，所以雖然佢去過中資機構、解放軍軍營及外交部駐港辦公室查問，但一直茫無頭緒，惟有登報出重酬，希望有人提供線索。
有人話世間最遠嘅距離唔係天各一方，而係你喺我身邊，但我一直唔知道。八方希望Dafe見到雨晴張相，願意同佢見面。雨晴轉告話：「如果你仍然單身，希望你可以接受我，如果你已經有家庭，但願我們可以做朋友。」