呢幾日股市大起大落，令股民心情有如「過山車」；不過有睇開英格蘭足總盃的球迷，相信心情亦與一眾散戶不遑多讓，事關第3圈爆到七彩，唔少超聯球隊都「遭殃」。踏入第4圈，究竟熱門球隊會否抬頭？戰鬥員A就認為「冷鋒」已過，更推介車路士為今集心水。
戰鬥員A心水推介
星期六2 曼斯菲1:1米杜士堡（7倍）
星期六11樸茨茅夫2:1普利茅夫（6.5倍）
星期六29韋根0:2車路士（6倍）
M：Mike R：Marco 戰：戰鬥員A
M：呢幾日好凍噃！
R：係呀，不過我啲貼士就一啲都唔冷，今次一定撐熱門。
戰：咁你點睇足總盃？
R：戰鬥哥，我第一場就好唔認同你。
戰：點解呢？我貼曼斯菲和米杜士堡1:1唔啱你心水？
R：我覺得你嘅貼士，就十足早幾日股市跌2,000點；我嘅呢（米堡贏3:0），梗係十足十升番2,400幾點嗰時喇！
戰：咁之後咪又係跌番！
R：咁就要踢完呢場先知喇！其實我都好認同你嘅1:1波膽，不過我覺得今次會正路少少。
戰：我始終覺得米堡攻力有限，前鋒成日唔識入波，進攻更加「死火」，所以估佢哋贏唔到。
R：佢哋仲有個端基，以及一個同香港7屆冠軍騎師同名嘅後衞（韋達）都識入波，而且班底始終高過曼斯菲好多，所以值得博一博。至於另外嗰場韋根對車仔，假如係聯賽的話，我就會估0:0。
車仔夠穩兼吼「細」
M：呢場最緊要係睇車仔個陣，假如真係出卡維奴拍施治，都幾難會失波，你睇車仔對愛華頓，施治救幾多必入波就知。
R：呢樣都真，所以「細」都係好選擇，事關車仔因為非國盃走咗幾個中前塲主力，入球能力大減；你睇佢哋喺足總盃上一圈對住昆士柏流浪，都係小勝1:0就知。車仔雖然攻力減咗，不過防守依然咁勁，令個「細」更似樣。
Marco貼士
星期六2 曼斯菲0:3米杜士堡（8.5倍）
星期六11樸茨茅夫1:0普利茅夫（6.5倍）
星期六29韋根0:1車路士（5.8倍）
捧阿仙奴反底拆「紐」
首次登場嘅Victor，認同戰鬥員A嘅心水，相信車仔可以輕輕鬆鬆贏兩粒。不過，之後戰鬥員A認為阿仙奴今周對住紐卡素會有苦戰，Victor就有啲難以置信，更加寸寸貢咁話，就算基瑾幾叻，唔通可以帶到呢隊衰波「上身」咩！
Mike就補充，雖然基瑾冇可能短時間執好晒隊波，不過就令到「喜鵲」士氣大振，唔使好似之前大敗於曼聯腳下時咁慘，所以點都有正面作用。
Victor貼士
星期六2 曼斯菲0:1米杜士堡（6.5倍）
星期六11樸茨茅夫2:0普利茅夫（6.5倍）
星期六29韋根0:2車路士（6倍）
老樸冇非洲兵仲掂
阿樂今次力撐一眾熱門隊，可以順利過關；因為上一圈爆冷頻頻，所以令強隊更有戒心，更加難出冷。
講到今周心水，阿樂就最睇好樸茨茅夫。雖然呢隊波走咗一大班非洲兵，不過津巴布韋嘅馬華路禾尼上仗就大演帽子戲法，證明老樸攻力靠得住；最重要係老樸喺英超唔上唔落，不如叠埋心水爭盃好過。唔好唔記得普利茅夫喺英冠只係排11，實力唔係想像中咁高。
阿樂貼士
星期六2曼斯菲0:3米杜士堡（8.5倍）
星期六11樸茨茅夫4:0普利茅夫（14倍）
星期六29韋根0:2車路士（6倍）
Rosa：阿紐戰愛鬥「大」
「近年英超球會越嚟越嚟急功近利，領隊為咗交出成績，乜盃都要爭，令足總盃難以再爆冷。今輪比賽我較有心水係阿仙奴對紐卡素，我估會開『大』。」
Rosa
前《球迷集中贏》主持
〈拉闊足球場〉
下次舉行日期：31/01
想參加？即上
http://soccer.atnextcom/jp/soccer
節目重溫：
http://sport.appledaily.com
