超級星期天點可以冇我求驗客？同平時唔同，逢禮拜日我會少啲批判，同大家分享多啲得意新聞，等大家睇得過癮。
「我答應你冇下次！」呢句幾乎係每個男人一生中必講嘅對白。車路士球星艾殊利高爾（A高爾）雖然向老婆雪露認低威，揚言「偷食」冇下次，但後者怒氣難平，終喺上周五將老公逐出家門，兼使出「如來神掌」怒摑老公洩憤，令A高爾「馬尿」披面；一旦離婚，A高爾坐底唔見7,700萬港元！
A高爾縱使同身材火辣、樣貌迷人嘅雪露走入教堂，但英國《太陽報》踢爆佢上年年底醉後失控，同比老婆後生兩年嘅少女艾美搞埋之後，如今東窗事發；最新消息係作為英國流行組合GirlsAloud成員嘅雪露面子何存，獲悉老公「偷食」後，立即一巴「車」向老公，並大叫：「你已經破壞咗呢段關係喇！」
離婚隨時唔見一筆
雪露身邊八卦密友披露，A高爾曾跪地求開恩：「老婆，唔會再有下次，畀次機會我……其實當時飲到好醉，我連佢個樣都記唔清楚！」但雪露呢啖氣仍吞唔落，A高爾惟有執包袱離開避鋒頭；街坊話A高爾以帽掩面，神情落寞，但結婚戒指仍在，證明未想放棄呢段婚姻！該密友仲話，雪露本來非常深愛A高爾，想生兒育女，共築愛巢，而其頸背刻嘅A高爾名字，就證明兩人關係刻骨銘心。
對雪露而言，人間總算充滿溫暖。當醜聞爆出後，全家總動員力撐，好似母親大人就飛去陪住乖女，而細佬仲打電話狂鬧艾美；而過來人維多莉亞亦致電慰問，惜雪露唔接電話，碧咸嫂只有留口訊表態支持。
畢竟雪露係娛樂圈有頭有面嘅明星，婚前已講明，對越軌行為採取「零容忍」政策，故有傳佢會攤牌離婚，屆時呢名英格蘭國腳身家起碼唔見一半，即500萬鎊（約7,700萬港元），而年薪450萬鎊中，雪露仍有權同佢分賬，可真算人財兩失！一夜風流，代價不輕，家花也許不及野花香，但野花卻可焚毀美好家園呀！
話你知：碧咸曾偷食獲開恩
A高爾的國家隊隊友阿倫史密夫，早前被爆因「猴擒」在廁所與女郎開戰，導致在歐國外對克羅地亞時連後備都沒有；看來，球星們仍未吸取教訓。
曼聯中堅里奧費廸南，曾因帶頭大搞性派對而遭領隊費格遜嚴重警告，還有林柏特在美國與東歐女子歡好，亦斷正。當中，現效力美職洛杉磯銀河的碧咸，當年被踢爆與女助手搞埋的事件，就轟動全球；一夜間，「天下烏鴉一樣黑」的說法流傳廣遠。
維多莉亞?恕免離婚
然而，「碧咸嫂」維多莉亞經過左思右想，始終認為碧咸是一生最愛，並原諒了老公一時行差踏錯，免得離婚收場；「辣妹」堅信知錯能改，善莫大焉，假如其友雪露也認同這信念的話，A高爾也許能逃過一劫。A高爾假如想向碧咸取經如何「冧女」，相信暫時還未時候，事關早前有南京商人以仿碧咸的名字「貝殼漢母」（BEKHAM）出產避孕套，「萬人迷」正循法律途徑，控告對方侵權。
值得一提，《衞報》指碧咸剃陰毛習慣已為同志爭相仿效，成為風氣，很明顯，人人只記得萬人迷「型」的一面，他曾偷食斷正一事，已越來越少人提及。文：阿呢斯奧