人大選舉騷正式落幕，雖然普遍市民都唔係太關心呢個冇份參與嘅圍威喂選舉，但都唔好睇小呢次選舉結果，事關都反映到邊啲親中紅人喺未來五年當旺、邊啲又會一沉不起。要數「紅」色政途一片光明嘅，肯定非查史美倫、羅范椒芬同陳智思莫屬；至於邊個最down甚至最dup喇噃，曾憲梓、黃宜弘同梁富華都冇走雞，唔係點會通通被out？
查太曾經擔任中國證監會副主席，果然零舍唔同，初試啼聲就已經有成1,108票，以10票之差緊迫得票最多嘅范徐麗泰。佢嘅專業背景、工商界嘅鐵票支持，加埋查家同阿爺又friend過打band，佢又幫朱鎔基打過工，日後一定獲中央力保，喺北京肯定有排玩。
陳智思最年輕港區人大
另一崛起進軍內地政壇嘅陳智思Bernard，由於佢父親陳有慶做咗多年人大，到今年退出唔選，陳智思最初擔心被人質疑子承父業，但最終擺脫心魔，去馬參選，以43歲之齡成為歷來最年輕港區人大代表。中國政壇70歲都未算老，睇嚟Bernard都有排玩。陳智思同查史美倫亦係行會成員，係煲呔身邊嘅紅人，以咁嘅身份，未來幾年北京同香港兩邊吹乜風都收齊，單係咁嘅政治條件，足以令佢哋成為政治大藍籌。
至於唔嫁唔嫁到積極參選再當選嘅羅范，佢雖然喺教院風波被指干預學術自由，但就贏得親中fans支持，成為贏家。
有人歡喜有人愁，全國人大常委曾憲梓肯定好sad，事關佢一心推阿仔曾智雄參選，點知阿仔未必surewin，最後要自動放棄，無法延續曾常委開火鬧泛民嘅愛國工作，以後人大又少個soundbite王。
至於中指黃，除咗衰喺自己手指手上，亦可能因為太過眼瞓搞到不得民心。雖然中指黃噚日講到今年立法會選舉會繼續落場，但據聞中總未必再撐佢，極有可能成為人大同立法會議席嘅雙失人士，專心喺屋企休息，唔使喺議事廳瞓過龍。
至於鬧過陳日君樞機係病態聖徒嘅梁富華，雖然被工聯會掟過去外國「深造」，收埋幾年洗底，但成效顯然唔大，否則唔會成為中聯辦40人推薦名單中最低票嘅一個，以後要翻身，睇怕都仲好難囉。