想了解多一點身邊嘅伴侶，但又唔想直接問；唔知初相識心儀異性，是否適合自己，但又唔想花時間慢慢了解，有辦法，叫對方玩吓以下嘅心理測驗啦，初步了解，好處係──快得嚟唔太直接，免傷感情！
文：Aphrodite
遊戲開始：
向對方提問以下3條問題，咪俾佢望答案，亦唔好俾佢諗咁耐，第一個答案為準，冇得反悔翻兜，如果唔係就唔準㗎嘞！
測驗一：
行過麵包店，裏面傳出新鮮出爐麵包香味，憑香味，你覺得係咩麵包呢？
A. 菠蘿包
B. 墨西哥包
C. 牛角包
D. 芝士包
測驗二：
玩具店有一種嚇人嘅玩具，睇到就令人想嘔，你覺得會係邊款搞到你咁呢？
A. 眼會流血嘅骷髏骨頭公仔
B. 滿面膿瘡嘅水怪公仔
C. 凸眼長脷嘅妖怪公仔
D. 流膿兼齙牙嘅禿頭蟲公仔
測驗三：
遇上海難，你被冲到一個荒島上，醒番見有人喺你旁邊，你認為會係咩人呢？
A. 勤奮嘅啞巴，唔識講嘢，但你可以向佢求助。
B. 食嘢唔做嘢，但會講笑話𠱁你開心嘅人。
C. 多嘢講，但唔會照顧你嘅人。
分析：
呢3條問題分別測驗一個人3種最基本嘅做人態度，對金錢、感情、愛情專一的看法，所以，大概可以看出呢個人究竟適唔適合自己，同埋值唔值得交往呢？
測驗一：價值觀
A. 揀菠蘿包嘅人，天生貪小便宜，邊度有着數，問佢最清楚，人又小家，成日諗住慳自己、豪人哋。
B. 揀墨西哥包嘅人，不善理財，連自己個身有幾多錢都唔知，有幾多使幾多。
C. 揀牛角包嘅人，知慳識儉，應慳則慳，應使得使，唔會貪小便宜之餘，又唔會待薄自己，有計劃地理財及投資。
D. 揀芝士包嘅人，非常注重優質生活，但又不至於視錢財如糞土；為求開心，只要能力所及，使多啲錢都冇所謂。
測驗二：有冇同情心？
A. 揀骷髏頭公仔嘅人，個性堅強獨立，仲有啲冷血，喺佢心目中，每件事都有其解決方法，發生任何事都沒甚麼大不了，冇嘢需要同情。
B. 揀水怪公仔嘅人，感情過份豐富，任何感人嘅事，都好容易喊一餐，人哋有事，一定義不容辭幫忙，同情心爆棚。
C. 揀妖怪公仔嘅人，較為理智，先分析事件，要幫就一定幫，唔會扮好人，唔抵幫就死都唔理。
D. 揀禿頭蟲公仔嘅人，唔識佢嘅人就以為佢冷血，講嘢夭心夭肺，熟佢嘅就知其實佢係口硬心軟，只係把口唔收啫。
測驗三：容易有第三者？
A. 保持住傳統保守觀念，根本無法接受不道德嘅行為，認為愛情係純潔嘅，愛一個人便應該一生忠心。
B. 唔會主動搵第三者，但若有其他外在因素，可以發展曖昧關係，一定會試，而且會泥足深陷，不能自拔。
C. 完全唔想負責任，絕對會朝三暮四，就算搵到真愛，亦不打算改變拈花惹草嘅習性，自覺性同愛可以分開，何必執着呢？