一月十九日，比聯、永亨與新城辦投資講座，好此道者踴躍入場，喜來登酒店宴會廳不斷增加座椅，坐到滿晒，後至者惟有企在後面，可見今時今日，最緊要聽吓專家教路，點樣搵錢。
沈大師振盈登壇講法，先講一輪美國次按危機、中國宏調壓力，佢在中大崇基讀工管，有經濟學基礎，自然講到頭頭是道。崇基除咗出評馬人之外，亦盛產玄學專才，沈大師係其中一位，自然要講吓鼠年運程。上星期左丁山先至聽到高手羅富昌嘅高見，昌哥介紹三位崇基師弟認識，昌哥話三位師弟都係紫微斗數高手，佢自嘆不如，論功力願排第四。師弟之中，最高手嗰位係數學系畢業生，用數學方程式解構易經八卦，再聯繫至紫微斗數（與月亮有關）與子平（與太陽有關），聽到左丁山目瞪口呆，請佢編輯成書，昌哥話願意包起出版費喎。
崇基係基督教書院，點解幾位叻仔對中國玄學咁有研究？睇嚟係通識教育之功也。沈大師以戌子年立春（二月四日）八字計○八年股市，八字係戌子年，甲寅月、甲戌日、甲戌時，內含四陽木三陽土一陰水，欠金欠火，沈大師話立春日係甲木，屬劫財格局，解釋就係鼠年有錢搵，但太多兄弟爭食，競爭激烈，搵錢要花一番氣力。
根據沈振盈之言，鼠年經濟放緩，有利「金」、「火」行業，北水會南調，時維初夏（農曆計），以中資股最得利，但不可不知嘅係，經濟狀況於八月七日開始轉壞。點解呢？八月七日午時（十一時至一時）轉為庚申月，雙金劈木也。故此沈振盈批○八年係市況先反覆，後大跌之局，上半年看淡。
點都要講吓冧巴啩？沈大師卒之話可以買屬火股票，佳選係中電信（七二八）、中通信（五五二），與屬金股票，有招商銀行（三九六八）與紫金礦業（二八九九），信不信由你，信者可跟番多少，當然要首先衡量風險，與自己財政能力先啦，股價可升可跌㗎。
聽沈大師講完之後，星期一（一月二十一日）恒指大跌千三點，星期二跌二千點，星期三升番二千三點，呢個deepV反覆之大，直情嚇死人，真係好反覆也。