自從大劉劉鑾雄喺06年9月以140萬蚊投咗個自訂車牌「1L0VEU」，創香港自訂車牌拍賣最高價，之後年幾冇咩大手交易。不過噚日有兩位神秘男士出手好闊綽，佢哋除咗用成140萬投咗個「CH」車牌，平咗大劉紀錄，跟住再用27萬投另一個「WY」車牌，豪氣程度令旁人O晒嘴、嘩嘩聲。
兩神秘男子140萬投得
噚日「CH」車牌，兩位神秘男子同另一對年輕男女輪流出價競投，底價5,000蚊，叫到1.5萬時突然間跳到去15萬，再跳去20萬，當堂嚇窒全場。兩組人不斷叫價，最後嗰兩位神秘男子推到去140萬時，對手收手唔玩，佢哋就以平最高成交價紀錄奪得車牌。兩位神秘人好得戚咁攞走個「CH」車牌，但無論記者點問，都唔肯透露身份，或者回應係咪受人所託。
畀老董用嚟頂紫荊車牌
「CH」呢個車牌確實令八方聯想到好多人，最需要「CH」車牌嘅，首選應該係前特首TungCheeHwa董伯伯。97年老董做特首之後，出入都係用專車，唔使用車牌，只掛一朵紫荊花，呢朵花足以令警車開路，無遠弗屆，全香港去到邊度，人人都知佢係邊位，離遠亦都認得佢座駕。
雖然腳痛落咗台嘅老董位列國家領導人級嘅全國政協副主席，但喺特區政府佢只係一位前任特首，係咁意搵架好少人認得到嘅「AM」政府車畀佢用，如果老董用個「CH」車牌，朝朝去舊英童學校嘅前任特首辦公室返工，就可以攞番少少face，回到當年見車如見人嘅地步。
另一位政圈中嘅CH，係行會成員梁智鴻醫生。CH梁係泌尿科名醫，外號金刀梁，近排搞緊老人問題，佢建議政府檢討生果金金額，同研究發放「老人券」嚟改善老人待遇。金刀梁嘅中間分界髮型，好多人同八方一樣，由唔慣睇到慣，至於佢喺政界嘅立場，要分類亦唔容易，如果佢可以換個icon嘅話，用個特別車牌或者令人容易啲記得佢。
政界以外，娛樂圈亦講求知名度，有個資深從業員又係叫CH，邊位？咪係由頭到腳前後左右都有好多紋身嗰個呢……可能好多人會估到，「咪志雄哥囉！」冇錯，志雄哥行走江湖多年，紋身當然係身份象徵，不過時代唔同喇，好多人興改變形象，搵個「CH」車牌傍身，配番架斯文靚車，咁嘅行頭怕且會更加矚目㖭！
部份自訂車牌成交價
CH：140萬元
00V：21萬元
EASY：5.5萬元
FATB0Y：3.4萬元
G00DLUCK：2.4萬元
W0WW0W：2.2萬元
MYP1G：1.6萬元
資料來源：運輸署