踏入08無耐，萬事得嘅房跑車種Mazda6率先以全新面目登場，外形變得更歐化，講究線條同運動感之餘，車前車後以菱形叠菱形嘅車燈，甚有「菱」氣逼人之勢；性能同設備上，更以高科技掛帥，擺明越級挑戰歐洲中價豪華房車。
記者：黎頌詩
攝影：楊錦文
Model：Suki
菱形燈最搶
痛快，睇到全新Mazda6嘅第一個感覺，大刀闊斧大變身，感覺耳目一新。充滿歐洲車時代感新形象，比起舊版嘅硬朗，新版明顯更多活潑感覺。頭冚線條同鬼面罩一氣呵成，呈稍為圓潤嘅V形，相當流麗。最有特色係頭燈，完全甩掉舊版嘅影子，用菱形嚟做設計主題，明顯由三個菱形組成，獨特又有型。
再睇落下方嘅氣壩同霧燈位置，充滿菱角嘅線條再配一對甚少見嘅菱形霧燈，即時大搶收視。車頭大執，車尾一樣無欺場，一樣係燈位最搶，呼應車頭，又係菱形組合，「菱形」，的確係Mazda608新Look中最堪玩味嘅一環。不過，相比起處處起角嘅車燈及氣壩造型，整部車嘅線條卻反而變得更為圓滑，運動感無可否認更勝一籌。
a.中控台頂端顯示屏變嵌入式設計，更為美觀。
b.按鈕撻車，高級座駕感受。
c.內櫳賣弄高級感，用黑色紋理粉飾，效果不錯。
高智能車廂
雖外觀上叫人眼前一亮，不過新版Mazda6主要賣點反而放喺內涵上；聲稱擁有12項同級車款中最強嘅裝備，而全新嘅醒目外觀，只係其中一項。高科技智能化內櫳，更加叫人目不暇給。
先睇表面功夫，整個駕駛艙陳設明顯多咗時代感，中控台上嘅操控介面整齊歸一，除真皮及電鍍裝飾外，更巧妙用上有紋理嘅樹脂裝飾，散發高級感。有姿勢一樣要有實際，與Bose合作設計8聲道、內置6CD嘅音響組合，兼容iPod，更可以透過軚環上按鈕操控，簡直係越級挑戰中價豪華房車標準。只要手握軚環，便可透過上面嘅按鈕調校冷氣、音響同行車電腦，又係一項貼心過人嘅設備。
按掣撻車，仲有驚喜，中央顯示屏同錶版嘅燈光會由低至高亮起，標榜戰機式起動顯示，型爆！全黑真皮座椅，司機位有埋記憶功能，一樣Sell高級感，夠闊夠舒服值得一讚，後排連中間位都有埋頭枕及三點式安全帶，三個人排排坐都好舒服，值得一讚嘅係腳部空間意外地充裕，好有豪車Feel。
聰明跑車波箱
喺性能上一樣升級，全新直列4汽缸鋁合金引擎，提升至2.5公升，兼配備S-VT連續可變活瓣正時系統，最大馬力達170匹。重點改良低轉扭力，令引擎轉速在1,700到5,800轉間均能輸出90%以上扭力。全新5前速自動波箱用上RX-8超級跑車技術，簡單講即係全自動模式下，系統會偵測路面情況和駕駛者嘅舉動嚟決定波段，從而跑得更順，想玩手動感，新增加減波撥片亦可滿足你。
集咁多先進設備於一身，梗要試一下佢嘅實力；用自動模式行駛，起動相當敏捷，雖然車身增大，但重量卻較舊版輕32kg，踩油上大斜路，不算力量澎湃，但就全無乏力感。至於走彎表現，平穩亦不失靈活。可以話，呢部身形稍大嘅新版Mazda6，讓你輕鬆駕馭，加埋車內各種超班設備，駕駛肯定可以係享受。定價$248,000，推廣期優惠更平一萬，應具吸引力。
全新Mazda62.5規格
引擎：2,488c.c.
馬力：170hp/6,000rpm
扭力：23kgm/4,000rpm
傳動：5前速+/-自動波
尺碼：4,755×1,795×1,440mm
軸距：2,725mm
查詢：萬事得汽車（28931112）