股市在牛熊線之間擲彎飄移，散戶要吃驚風散，不過對家有牛王頭的師奶，根本不會當一回事。因為帶孩子，每天都是牛熊線爭持，他乖時是牛氣沖天令你覺得自己是索羅斯畢菲特和任志剛的fusion。可是，當孩子撒野，你會恨個股價機幹麼這樣慢，忍不住敲打它，一邊罵自己，點解精明一世，都會入錯市睇錯盤。
股民坐埋肯定number滿天飛，師奶一樣，講自己揸住那隻幾號仔點點點跑贏大市。係呀，阿仔贏了校際圍棋大賽，去年更得到數學獎，我打算明年送他去美國太空總署的暑假camp。隔籬師奶明知自己hold住那隻落後大市，唯有顧左右而言他，說阿仔成日做義工，關心長者和到孤兒院派玩具。嗯，雖然成份不同，市值不一，不過睇市要睇長線嘛，我家這一隻，說不定會後來居上哩。噢，當大市調整，全球股災，布殊帶頭，教統局跟風發功干預，師奶就有偈傾了，可以拿投資專家和教育局當狗般痛罵。股民輸錢賴地硬，師奶個仔考不上喇沙小拔，卻肯吸取教訓，作詳盡分析。而無論個市跌幾多，師奶永遠是打不死的樂觀主義者，是股民中的天生大好友，會睇定形勢趁低吸納，大手溝貨，生多兩個。師奶最忌是空倉，獨留孩子在家，損失可慘重了。
但話說回來，雖然我已經將牛王仔當成能夠終身付託的優質大藍籌，可是，當他作反搞到家嘈屋閉時，我馬上想到沽貨離場。師奶人在江湖，比講股專家有預見，早就知有今日咯，注定是要勞氣損手回報甚低的。