Weareincrisis！學詹瑞文喺佢嘅舞台劇〈萬千師奶賀台慶〉中，對現今電視文化嘅鞭撻，我呢個〈蘋果開倉〉版主打負責人亦因為接連受挫，每下愈況，個人正處於信心危機之中，不過學「師奶台」拍劇方針，橋唔怕舊，最緊要受，我今次貼士亦捧番近期贏過錢嘅球隊，食髓知味！
只知有收視保證有廣告商撐場，劇集又怕乜換人翻拍又翻拍，創意零蛋，乜嘢〈戈師奶〉、〈遇着兵〉同今年將捲土重來嘅〈溏心2〉，舊瓶新酒；同樣鎖定目標球隊，有戰績有戰意有盤路支持，何懼捧完再捧。
盃賽之王再追一鋪
上周又買大開細，3千多分投注又泡湯，今個禮拜又到足總盃主打，重心場次仍選上次貼中爆大冷贏布力般嘅英冠高雲地利，主場掃低甲組嘅米禾爾，再捧阿仙奴同AC米蘭！
上次第三圈貼中高雲地利7.5倍W，今次由冷變熱，得番1.67倍，按理不值博；但盃賽之王，儘管有後衞兵荒，有前鋒奇雲基爾停賽，但最重要仍由第3圈之星、「蚊子」米蘇特掛帥，配艾廸保拿威力依然，對手米禾爾為甲組下游，下周二還要在聯賽護級大戰，作客硬拼車頓咸，料高軍穩W，兼博盃賽續保持神勇，大炒對手一舒兩連敗悶氣。
再選買阿仙奴，接連兩場開入球大，我擂台貼士都命中，今次學〈拉闊足球場〉「烽煙」嘉賓Rosa話齋，上仗大敗宿敵熱刺太難睇，今次必搵殘陣嘅紐卡素祭旗，以讓球迷忘記創痛；兩軍會喺下周中聯賽再鬥一次，阿仙奴上仗大敗會換來較好分賠率，波友萬勿錯過。再選，未想過捨棄周中受挫嘅AC米蘭，今次返主場對熱拿亞穩贏，可作過關膽。
近5場往績：輸輸贏贏贏
蘋果波神
英超波癡有一個心願，5月話你知！