臨近新年，個個商場都大搞換利是封活動，一時間花多眼亂唔知換邊款好。唔使煩，我哋一次過搵咗海港城、時代廣場、鑽石山荷里活廣場、太古城中心、旺角新世紀廣場、新都會廣場、沙田新城市廣場同東涌東薈城來個大比拼，選美鬥靚，一於睇睇邊個設計最得大家歡心。
記者：葉雪芯
攝影：楊錦文
Model：Annie@stagemodel
No.1
時代廣場：立體富貴魚
好多商場利是封搵大師設計，但銅鑼灣時代廣場今年的利是封，則由推廣部門同事們設計，以年年有餘做主題，玩立體花款，封面的閃粉、立體錦鯉和花花可以自由運轉，金色封面仲好高貴，8大8小共16個利是封為1套；配上富貴吉祥利是clutchbag（有金福桃花及嫣紅牡丹兩款），就係咁，打敗咗其他一眾出名大師，成為最受市民歡迎，個個讚靚的冠軍作品。
Clutchbag分別有金、粉紅兩色。
「錦鯉好靚，個clutchbag方便派利是。」
「設計好生動喎，而且大方高貴。」
「『年年有餘』主題唔錯，就算下年用都得。」
小克評語：「喂！『紅封包』不應該是紅色的嗎？」
日期：即日起至換完即止
地點：時代廣場二樓大堂客戶服務部
查詢：21188900
換領方法：到時代廣場或食通天消費滿$800，即可換領1個clutchbag及利是封1套。
No.2
海港城：中日共和
海港城今年一次過搵咗兩位設計師操刀，最特別係請日本年輕設計師板倉敬子設計金光閃閃利是封，共5款不同顏色，既有日本和紙風格，亦有中國牡丹及傳統賀年圖案。另外又有名書法家陳子慧「鼠」年利是封，以紫色和米黃色調為主，一個「鼠」字夠晒形象化，梗有一款至啱心水。
「板倉敬子呢個靚喎，傳統得嚟又有特色。」
「利是袋好靚，平時當化妝袋用都得。」
小克評語：板倉敬子嘅設計不俗，起碼有傳統花紋。
日期：1月26-27日、2月2-3日
地點：海港城海洋中心二階、海港城港威商場二階
查詢：21188666
換領方法：於商場消費$800或以上，再捐$20予「心晴行動慈善基金」，即可換領其中一款利是封1份。
No.3
旺角新世紀廣場：老鼠頭賀年
又一無師自通的利是封設計！旺角新世紀廣場的金牙大旺利是封用老鼠做主題，封面有大大個老鼠頭，加埋大隻隻大板牙，樣子可愛。揭開利是封，仲有老鼠仔另一個鬼馬表情，背面印有閃令令「金牙大旺」或「合皮扭耳」幾個字，好盞鬼！
小克評語：卡通公仔跟春節有何關係？我覺得似聖誕卡多啲。
日期：即日起至2月6日，換完即止。
地點：旺角新世紀廣場一樓嘉年華換領站
查詢：23970790
換領方法：於場內消費滿$300，即可換領1套，換完即止。
No.4
荷里活廣場：金邊鼠影
另一大師水禾田設計的利是封，係為荷里活廣場設計的「鼠年利是封」，格調高貴，以金邊勾畫出小福鼠外形，印刷在金黃色閃紙上，分別有大封和細封選擇。
小克評語：『紅封包』應該係紅色！你會唔會用紅封包去放帛金？
日期:即日至換完即止
地點:鑽石山荷里活廣場一樓明星廣場
查詢：21188811
換領方法：於場內消費滿$500或以上，即可換領一套。
No.5
太古城中心：線條簡約
唔算係好特別的設計。金、銀色調為主，以鼠年做主題，在「鼠年大吉」四字上加了一對老鼠耳仔和一條老鼠尾，平凡中有一點花款。
「紙質幾好，幾硬淨，設計大方。」
小克評語：利是封紙質太厚太好，反而唔環保。
日期：即日起至2月10日
地點：太古城中心商場客戶服務處
查詢：25688665
換領方法：於場內消費滿$1,200或以上，即可換利是封一套，換完即止。
No.6
沙田新城市廣場：迎春接福利是封
No.7
葵芳新都會廣場：財氣娃娃利是封
No.8
東涌東薈城：得心應手利是封
小克：
紅色最啱Feel
結果發現時代廣場成為大贏家，最受市民歡迎。不過受普羅市民歡迎，不等於得到評審的肯定，潮人插畫家小克只係對海港城利是封睇得上眼，他說：「傳統節日，點解利是封都咁唔傳統？紅封包，除咗海港城之外，點解好多都唔係紅色？」我惟有代大家回答小克，因為香港人都想走在時代尖端囉！
