玩「拾肆K」玩到差啲俾警方當黑社會告嘅「住好啲」家居用品店，又再挑戰道德界限，佢哋將一件「大濫交野公園」嘅不文T恤交畀淫褻物品審裁處評級，T恤上面仲印住幾露骨嘅車震卡通，結果被評為二級不雅。
住好啲主席楊志超話，預咗T恤會引起爭議，但佢堅持要有創作空間，「T恤主題係以幽默形式去表達『大濫交野公園』，中文字可以用唔同方式去理解，並唔係要鼓吹濫交，我唔覺得係低級趣味。」
佢又話，唔少擁躉已追問T恤幾時出，佢哋吸收咗「拾肆K」嘅教訓，一定依足法例做，將T恤包膠袋，印上警告字句。T恤最快下個月出街，售價約200蚊。