噚日金價再創新高，尖沙嘴溫小姐推介紫金礦業（2899），初步目標價13蚊，不排除會再調高。對於主持孫柏文話：「呢隻股由上市至今，未試過平，如果攞江西銅（358）、中石油（857）嚟比，呢家公司嘅PE（市盈率），永遠都係佢哋三、四倍。」不過，溫小姐揚言：「呢隻股，有買貴，冇買錯。」
對紫金充滿信心，全因溫小姐睇好金價，溫小姐預測：「金價會升到上1000美元。」噚日黃金已經升到914.7美元嘅新高，所以對於溫小姐嘅預測，孫柏文笑言：「咁少？」溫小姐補充：「睇定啲，之後先將止賺位向上推。咁你又睇紫金嘅目標價係幾多？」孫柏文答：「五六十蚊。」不過，就要揸起碼10年。
除咗正股，溫小姐亦有意買窩輪，刀仔鋸大樹，法興證券衍生工具部策略師朱紅介紹紫金認購證4385，7月7號到期，行使價11.98元，「呢隻輪年期算適中，如果配合你睇紫金上到13蚊，屬於中長期貼價輪。」
溫小姐問：「如果真係炒紫金輪，有乜要注意？」朱紅提醒：「由於𠵱家市況好波動，你吼準一啲正股，喺支持位嘅時候，主要嘅資金買番正股，用小量資金買輪，試一試，睇番隻窩輪嘅表現如何。仲有要跟番你入市時嘅目標價，當正股貼近呢個目標價嘅時候，窩輪你就要即時獲利離場。因為好多時投資者贏咗又唔賺，之後會輸咗時間值。」
新地（016）
勢受惠負利率
西環David噚日打嚟話，「伯南克今個星期減息四分三厘救市，擺到明唔敢令市場失望，下個星期最少會再減息半厘，負利率之下對地產股有利。」因此推介龍頭地產股新地（016），建議現價158.4蚊買入，估計1個月會見170蚊，睇升7.3%。
朱紅指：「如果David睇新地可以到170蚊嘅話，可以考慮一啲行使價170蚊兼較長年期嘅價外call輪，捕捉股價接近行使價時候嘅爆炸性上升。」
但佢提醒David，由於價外輪時間值損耗較大，就算獲利都要留意離場時間。
中移動（941）
走勢靚想追入
30幾蚊買過中移動（941）賺過錢嘅美孚陳太，見中移動走勢靚番，心思思想追貨，「呢幾日個市升升跌跌所以唔敢買，不過見今日個勢咁好，喺123蚊入少少博唔博得過？」中移動噚日收123蚊，升近6%，今個星期最低見過108.2蚊，現價較低位反彈一成三。
朱紅話：「如果你認為港股已經跌夠，作為港股火車頭嘅中移動唔會太差；如果下星期真係再減息，加埋港股直通車消息，電訊業其實係唔錯嘅投資板塊。」佢補充，「𠵱家市場對後市有唔同睇法，大市閒閒哋上落千幾點，就算入場都係小注怡情比較保險。」
陳太建議
建議買入價：$123 目標價：$130
止蝕價：$120 時間：2星期
中石油（857）
有意趁低溝貨
黃大仙劉小姐手上揸住高位買入嘅中石油（857），佢話：「見個市形勢好番，想趁低溝貨制唔制得過？」中石油噚日收報11.88蚊，升8.6%，較今個星期低位9.58蚊反彈二成四。
孫柏文就話：「中石油𠵱家市盈率比歷史市盈率貴，有成13至15倍，比起以前單位數嘅8倍高好多，不過睇番隻股嘅NAV（資產淨值）有成13蚊，高過現價好多，所以長揸都應該冇問題。」
劉小姐跟住追問隻滙豐控股（005）：「喺118蚊走咗貨，現價可唔可以追番？」孫柏文認為，就算想入，都等佢撇晒賬先入。
第一上海（227）
借消息炒落後
柴灣羅先生推介內地背景嘅證券行第一上海（227），睇好原因係：「內地A股跌咗好多，上海股市見過4600點，呢兩日中央證監部門又傳出消息，話放行券商發理財產品。」羅先生建議吼2蚊入貨，兩星期目標價2.3蚊，睇升15%。第一上海噚日收報2.12蚊，升6%。
羅先生話：「之前第一上海同申銀萬國（218）拍住行，申銀升咗咁多，第一上海有條件追落後。」孫柏文認為：「呢隻股喺2蚊支持力幾強，今年盈利應該ok。」
朱紅就話，「證券公司主要收入係嚟自買賣佣金，如果個市成交好，對中資證券亦會有利。」
法興派定心丸
主持孫柏文（圖右）及聽眾都關心法興法國總部炒期貨出事，喺香港買法興嘅窩輪會唔會受到影響？柴灣聽眾羅先生問：「法興喺香港嘅財務係咪獨立？」孫柏文都話：「𠵱個問題大家都好想知道答案，好似當年百富勤執笠，佢出嘅窩輪一樣死晒。」
朱紅（圖左）雖然冇就法興炒燶期貨事件作出評論，不過就大派定心丸話：「大家可以繼續放心買賣法興窩輪，今日法興有繼續為窩輪開價，市場佔有率仍然係第一，投資者毋須擔心。」
下周一嘉賓：東方匯理衍生產品董事李靄欣
每日收市後4:30pm
歡迎Phonein28698262
http://finance.appledaily.com
想搵名家教路，請登入
http://appledaily.atnext.com/jp/finance登記
成功參與節目者，有機會獲贈禮品，
登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
