勤達（1172）由上年8月兩蚊水位，到家陣足足插咗80%，重返03年沙士期低位，勁抵買，要長線收貨。勤達呢期踏足祖國殯儀業，揸咗「四會聚福寶華僑陵園」80.5%權益。
據墓園項目規劃，預計總共提供18萬個墓地及216萬個壁龕。就以墓地下限價8800蚊（人仔．下同），及壁龕2800蚊為準，成個墓園總收入，已經可以高達76億，勤達實佔61億銀。又以20%純利率計，勤達嚟自墓園嘅總純利，達到12億銀。以6年均分，每年純利兩億銀。就算連埋可換股票據攤薄效應計，勤達墓園業每年每股純利，講緊係0.32港元，係勤達現價（0.4港元）80%，PE得1倍多。
再講，家陣海外殯儀股，P/B全部講緊兩倍樓上，勤達股價倒水咁倒，現價P/B得0.41倍。純秤墓園業，勤達抵到爛。買勤達，博長線，睇嘅講緊起碼係一、兩番嘅升幅。
佑威祖國業務夠爆炸
佑威（627）現價（0.21元）又係同沙士期差無幾，殘得交關。佑威08年上半年度（9月底止），喺香港業務虧損之下，拖累到純利只係微升4%。
但集團喺祖國服裝業收入，增加咗30%到3億銀樓上，溢利keep住上億計，祖國業務爆炸力先係焦點。就算佑威下半年純利同上半年睇齊，全年純利1.37億銀，平均PE得5倍，NAV折讓又去到50%。ChinaPlay當中，佑威平到爆。佑威PE係咁易上番7倍，現價都要升40%到0.28元。
