股市風高浪急，散戶被嚇到暈陀陀冇晒方向，好多散戶都想見吓香港股神四叔李兆基，或者基金界股神瑞銀陸東，聽佢哋指點迷津。不過自從個市一跌，四叔同陸東都唔見蹤影，四叔未開金口前，都有大仔李家傑撐吓場，咁陸東呢？華華知佢呢個周末會蒲頭，出席渣打銀行搞嘅經濟論壇，之不過，若然諗住搵佢講吓個市，就未必咁容易喇。
華華收到料，陸東學咗四叔嗰招，事先聲明唔講嘢，即係論壇後唔會接受傳媒採訪。兩位本地股神喺個市升到磡磡聲嗰陣，就出嚟一唱一和，到跌市就一係玩匿埋，一係玩封嘴，難怪惹嚟唔少散戶不滿。
其實踏入08年後，陸東都發表過報告，調低恒指目標至28500點，過得冇幾日，佢再補多句，話港股牛市仍未完，今年走勢會相當波動，特別美國經濟衰退會喺年底先開始反映。至於追溯四叔上次蒲頭，已經係2007年除夕嗰晚，佢話今年係好時年，港股春季會見三萬三喎。𠵱家個勢唔同咗，佢兩位要唔要出嚟「調整」吓個預測呢呵？