講到冧女，其實谷德昭（肥谷）都有一手，前日肥谷同緋聞女王葉璇去灣仔出席有線電視宣傳活動後，就一齊行去附近嘅陶源酒家鮑魚專門店影相，沿路肥谷一邊煲煙，一邊撩葉璇傾偈，大家有講有笑，葉璇仲俾佢𠱁到嘻嘻哈哈笑唔停㖭。
到達酒家後，葉璇同肥谷即時埋位，酒家經理捧出多款唔同鮑魚，葉璇見到啲巨鮑都好驚訝，仲將巨鮑放喺自己個頭側邊，嘟晒嘴扮鬼臉。本來酒家經理坐喺葉璇同肥谷中間，向佢哋講解鮑魚種類，後來經理行開咗，肥谷馬上橫移，坐正葉璇身邊，而㷫㷫哋嘅葉璇仲起身除褸，除剩件短袖衫。
揸平治男助手護駕
冇耐侍應遞上煮好嘅鮑魚，諗唔到身形大大嚿嘅肥谷會咁細心，將啲鮑魚切到細細件，再遞畀葉璇慢慢嘆，葉璇有肥谷服侍當然笑不攏嘴，兩個人寓工作於娛樂，又食又笑，唔知幾鬼開心，嘆足兩個鐘至前後腳離開。
雖然肥谷冇送葉璇一程，不過葉璇都有男助手護花，揸住佢3年前以60萬買下嘅銀色平治跑車，直返漾日居香閨，到埗後男助手就自行落車離開。話時話，當年葉璇買呢部車同搬去漾日居時，正值佢同殼王陳國強扯上關係，有殼罩一罩，即時換車換樓，風頭之勁成為一時佳話㗎。