噚日大市波幅超過千四點，以接近全日低位23539點收市，跌550點或2.3%，個市咁波動，沙田阿Kim推介防守性高嘅港鐵（066），仲話「有邊檔生意可以咁好㗎，政府補貼佢，馬會又補貼佢，做佢股東一定冇死錯人。」阿Kim建議30蚊買入，25蚊止蝕，預期年半之後會去到目標價45蚊，睇升五成。噚日港鐵收報30.25蚊，微跌0.05蚊或0.17%，走勢比恒指硬淨。
敦沛金融投資研究部主管郭家耀都好認同阿Kim，「港鐵跌幅比大市少好多，本身有好多地，今年樓價仲有得升，再加埋下個禮拜如果再大手減息，佢手上嘅地一定會更加值錢，到時會有好多發展商用更吸引的條件同佢合作，而且港鐵防守性高，絕對冇揀錯。」
博加租 吼領匯冠君
阿Kim都話，長揸港鐵有着數，又問兩位主持點睇領匯（823）？孫柏文同阿Kim睇法一致，仲話「領匯係董建華唯一嘅德政，領匯呎租先廿幾蚊，同區其他物業都做緊90幾蚊；負利率加埋通脹飛升，嚟緊租金一定會加。」
郭家耀話佢自己都幾鍾意REITs，仲幾睇好另一隻REITs冠君產業（2778），「冠君雖然只得一座花旗銀行大廈喺金鐘，但係呎租已經由上年60幾蚊升到𠵱家嘅90至100蚊，而且息率比領匯更吸引。」孫柏文就總結話，睇好領匯可以博加租，郭家耀就睇好擁有甲級商廈嘅冠君。
《Kim建議》
建議買入價：$30
目標價：$45
止蝕價：$25
時間：一年半
港交所（388）
短炒要預坐艇
黃大仙劉小姐打嚟問隻港交所（388）同中國人壽（2628），佢問：「𠵱家價位，呢兩隻股買唔買得過呀？」港交所噚日報176.4蚊，升4.3%，國壽則跌3.3%，收報30.9蚊。
孫柏文話先講隻港交所，佢問：「你信唔信資金自由會落實呀？」劉小姐好肯定咁答：「會，個股市再差啲嘅話，佢就會放行通車。」孫柏文估計：「要到香港人對資金自由行冇晒反應，先至有機會落實。始終港交所好受成交影響，如果港股成交量再萎縮，佢一定受累。」
劉小姐追問：「咁你哋對後市點睇呀？」郭家耀認為：「你諗住短炒揸一個禮拜，風險大啲噃，𠵱家入市，你要有心理準備坐貨，因為股市隨時上落幾千點，要揸耐啲等業績反映股價，你提議嘅國壽都幾好。」孫柏文插口：「國壽同A股敏感度好高，如果A股唔得，佢亦都唔會點好，而你又諗住只係短炒，風險就仲大。」劉小姐話：「係囉，我就係擔心呢樣嘢。」
《劉小姐建議》
-港交所（388）-
建議買入價：$176.4
目標價：─
止蝕價：─
時間：一星期
-國壽（2628）-
建議買入價：$30.9
目標價：─
止蝕價：─
時間：一星期
中移動（941）
$109入貨夠穩陣
將軍澳梁太推介中移動（941），可吼109蚊買入，目標價120蚊，3個月睇升一成，佢問：「喺109蚊個位買入，係咪夠晒穩陣安全呀？」中移動噚日收報116.1蚊，跌3.5%。
郭家耀坦白話：「自己好鍾意中移動，就算喺現價買，抑或109蚊都OK，但要睇你揸幾耐，因為中移動係隻重磅股，幾受市況影響；睇番佢業績，07年市盈率有24倍，08年就預測17倍，有成兩成收入增長，現時股價一啲都唔貴。」
孫柏文亦話：「中移動可以話『有買貴冇買錯』，呢隻電訊股如果喺2000年買，到𠵱家已經贏到開巷，佢喺全世界電訊股中，唔單止可以返家鄉，仲贏好多。」郭家耀補充：「如果短炒，可以set低啲價博反彈，但諗住長線投資，現價買入唔反對。」
《梁太建議》
建議買入價：$109
目標價：$120
止蝕價：$107
時間：3個月
外滙put輪1080
堅信日強美弱
銅鑼灣Frederick推介外滙put輪（1080），睇好日圓，睇淡美元，可以喺現價0.34蚊入貨，佢話：「暫時好相信嚟緊係日強美弱，美國會繼續減息落去，美元只會越跌越多；而嚟緊3月同9月，日本公司會有年結，佢哋會調番啲資金返日本，有利日圓，通常農曆年日圓會衝一衝，有機會破100水平。」
郭家耀話：「美元弱，日圓亦唔會好得去邊，日本央行呢個禮拜啱啱議咗息，雖然冇改變息口，但對經濟睇法都幾審慎；有人睇日本有機會再減息，走番零息政策。」Frederick即刻話：「兩個都係衰㗎啦，只係買邊個衰啲咁解啫。」
郭家耀建議Frederick：「如果係睇淡美元，都係睇其他高息貨幣好啲，好似澳洲紙，而且呢隻輪都冇成交嘅。」
《Frederick建議》
建議買入價：$0.34
目標價：－
止蝕價：－
時間：至農曆年