無解嘅，啲人硬係唔曉吸取教訓，一個又係咁，兩個又係咁。前廣播處長朱培慶酒後攬女兼失儀避記者，助理廣播處長張文新酒後駕駛炒車，都係警惕唔到啲劉伶。前立法局主席黃宏發好飲兩杯係人都知，早幾日佢就飲大兩杯，大鬧港鐵。
據報道，黃宏發喺星期二飲酒後搭港鐵，途中發覺唔見咗個背囊，向港鐵職員求助。黃宏發要求職員幫佢報警不果，隨即發老脾鬧人，不過呢招都幾有效，未幾真係有警員趕到了解。八方噚日call極黃宏發都唔覆，港鐵就以乘客私隱為理由唔肯再講。黃宏發已經唔係第一次酒後出事，八年前，佢試過喺婚宴後醉酒駕駛，喺太子道東失事，吹波波證實酒精超標。