周潤發經常強調健康是最寶貴財富，所以他注重保健，對於自己體重，希望可以保持在165至170磅左右，為免中年發福，近年他積極運動，經常去行山和游泳，早前他便與友人揹背囊到內地遊黃山。 撰文：陳月媚
周潤發當年在無綫期間，因為日以繼夜拍劇，終於因過份操勞患上肝炎，自此他的健康響起警號，他也開始關注自己的健康，近年來毋須再為口奔馳，他將工作步伐放慢，不但每日抽兩小時做運動，還會很小心飲食，煎炸肥膩都盡量少吃。
夏游泳 冬行山
發哥演出《臥虎藏龍》時，他跟袁和平學識了耍太極，回港後一直有練習，他日前接受記者專訪時說：「好多人都以為太極只係老人家先學，其實呢啲觀念係錯嘅，𠵱家越嚟越多年輕人學耍太極，其實太極係一種強身健體嘅運動，我學咗之後，發覺對身體好好。我每朝起身都會耍半個鐘太極，夏天去游水，冬天就會行山，到夜晚臨瞓前又會做一啲拉筋運動。」
問發哥現時體重多少？他說：「𠵱家我大約170磅，營養師話呢個磅數都適中，但我希望再減多5至10磅就最弗啦！其實行山係一個唔錯嘅運動，好似早排我去黃山行一趟，真係身心舒暢，𠵱家上黃山天氣幾凍，又要爬山，少啲體力都未必頂得順，今次去黃山，我同幾個朋友揹個背囊就上山，因為行錯路，我同啲朋友喺個山上面行咗個幾鐘都未搵到間酒店，有啲朋友行完百步雲梯就頂唔順要停低休息，我反而冇乜事，可能平時都行慣山啦！」
賞日出 空氣清
黃山的住宿環境雖然簡陋，食物也不見得美味，但發哥還是堅持在山上住了兩晚，他說：「我志在嚟行山同影相，每朝五點就起身去影相，到天黑先返酒店食飯同休息，基本上9點就上床休息，酒店房間環境好唔好，我覺得冇乜所謂，食嘢我就仲隨便，好一餐，唔好一餐。」
發哥認為香港人平時少做運動，如果可以趁放假在香港或外地行山觀光，對身心都較好，他回味地說：「我企喺光明頂影相時，真係覺得風景靚絕，有朝我凌晨5點起身影黃山嘅日出，空氣好清新，個天又清，簡直係人間美景，香港平日生活緊張，應該放吓假，感受吓呢啲大自然風光。雖然喺山上面冇乜好嘢食，但睇咁靚嘅風景乜都抵番啦。加上我對食方面唔係咁講究，平日喺香港我都係食得好清。」
食早飯 夠傳統
以前愛吃紅肉的發哥，近年改為多吃白肉，他說：「醫生話食少啲紅肉對身體好啲，咁我咪多食菜、魚同雞，每日同老婆都係食兩、三碟菜就搞掂，煮啲菜會盡量少油少鹽，但白米飯會照食，不過食飯時最好係多飯少菜，咁就唔會咁易肥啦。其實我都係一個好傳統中國人，每朝起身都會食碗飯，不過早餐食飯就食素菜為主，唔會有太多肉類。」
發哥素淡餐單
早餐：一碗白飯或粥、青菜、魚
午餐：麥包、青菜、魚或海鮮類食品
晚餐：一碗白飯、魚、雞和青菜
心水食肆：食在九龍城
發哥識飲識食，最愛在九龍城「搵食」，且看他有何心水推介。
永富水果
九龍城永富水果店不但賣水果，還有大閘蟹，發哥指該店水果很多來自日本，十分新鮮，早前增設賣的大閘蟹也是又大又靚，所以發哥好喜歡光顧這店舖。
德昌魚蛋
如果在九龍城德昌魚蛋粉吃魚蛋粉時看到周潤發，千萬不要以為自己眼花，因為發哥的確經常來光顧，他說：「德昌啲魚蛋好彈牙、爽口，我同老婆都好鍾意嚟幫襯。」
方榮記牛肉
九龍城火鍋店林立，但發哥一定會光顧方榮記的特級牛肉，他說：「好多人鍾意啲入口即溶嘅和牛嚟打邊爐，但我就比較鍾意食有咬感同肉味嘅本地肥牛，方榮記嘅特級牛肉就滿足到我。」
拍片小八卦：艾美爆發哥半空狂影
眾所周知，發哥閒時愛拍照，而他有份主演、由漫畫改編的真人電影版《龍珠》（Dragonball），正在墨西哥拍得如火如荼，女主角艾美羅森（EmmyRossum）日前在自己的網誌中透露拍攝花絮，大爆發哥這位攝影迷經常影相。
艾美寫道︰「我現時在一架直升機上寫網誌，身後有周潤發及他可愛的妻子，還有JoonPark，周潤發跟Joon正在一起影相。我們飛過的地勢很怪異，稍後我會把自己相片上載上網。」未知艾美會否把發哥的作品一同放上網？
